Anda di sini

Pelajar ditagang mai telefon binching ke sekula

Advertisement

KUCHING: Terunda-runda ketegal jerita filem sereta deka didinga kering rita nyangka nya entara kebuah ke ngu­jungka sekeda pelajar sekula sanggup belaya tauka beduan pangan diri taja pan nemua pekara nya salah.

Kelimpah ari nya, undang-undang ke nadai terit ba sekula lalu ngujungka bala nembiak sekula bibas bebaika telefon binching. Pekara tu mega tau ngujungka entara kebuah kes belaya nyadi ba sekula.

Nangkan ke nya, lebuh be­baikka telefon binching nga­gai sekula, sida bisi ati deka belaya sereta ngerakam.

Nitihka penerang Presi­den Sarakup Pengajar uru Sarawak (STU) Jisin Nyud, kes belaya ke nyadi ba nembiak sekula nyangka la­ban terunda-runda nitihka jerita filem tauka internet lalu ngujungka sekeda sida sanggup ngereja ulah ke bansa nya.

“Sida mega deka ngasaika diri kering tauka tebilang rita pengudah laya sida dipasukka dalam laman sosial,” ku iya lebuh dirandau ensana.

Iya madah munyi nya lebuh dipinta nimbal penemu bekaul enggau kes belaya ke nyadi ba sebuah sekula di Asajaya entara pelajar indu ke bisi dipasuk dalam laman sosial.

Dalam video ngembuan timpuh seminit 17 sikin nya, pelajar indu ke ngerakam pekara nya ngelar dua iku pangan iya ‘gengster’ tauka ‘kak yong’ udah nya nyebut nama diri empu ‘pailang’ tauka dikumbai samseng.

Berindik ari nya, Jisin deka ngasuh raban pengereja pengawa ba sekula neritka undang-undang ngambika nembiak sekula enda tau mai telefon binching ke sekula.

“Opis Menteri Pelajar idah ngemansutka surat penerang enda ngasuh nembiak sekula mai telefon binching ngagai sekula,” ku iya.

Kes ke nyadi ba Asajaya nya, ku iya balat ngasuh ati tekenyit laban dikereja pelajar indu.

“Taja pan nya kes mit tang iya patut diperati eng­gau serius. Apai indai patut ngemeratka pekara tu laban semua utai bepun ari rumah lalu sida (pelajar) patut diajar enggau penemu pengarap,” ku iya.

Ba penemu Tuai Dipe­basa Sarakup Pengajar Bu­miputera Sarawak (KGBS) Ahmad Malie, Opis Menteri Pelajar enggau Polis patut bejalaika pansik bekaul eng­gau kes belaya ke nyadi lalu meseti nemu kebuah pekara nya tau nyadi.

“Kami (KGBS) enggai meda kes ke bansa nya (be­laya) nyadi baru lalu nyadika ulah pendiau sekeda pelajar nyengkaum enda betul nguna tlaman sosial laban mandan­gka ulah ke enda patut,” ku Ahmad.

Iya ngarapka bala pelajar ke besangkut paut enggau kes belaya tu nerima ukum ke setipak enggau penyalah sida.

“Tu beguna amat ngam­bika utai tu (kes beduan) ukai nyadi ulah pendiau bala nembiak lalu nadai nyadi agi dudi hari,” ku iya.

 

Advertisement