KUCHING: Undang-undang imigresyen deka diteritka agi di Sarawak dikena nyekat penama raban orang ari Semenanjung Malaysia ke ngembuan juluk deka ngeruga penyerakup pupu bansa ke nengeri tu.
Kepala Menteri Tan Sri Datuk Amar Adenan Satem madah, Sarawak ngembuan hak kediri ba pekara netapka undang-undang imigresyen lalu pengebih nya deka dikena enggau manah.
“Endang nyadi tanggung pengawa aku nentuka peranak nengeri tu seruran idup lantang baka ke udah diasai ngelama tu.
“Undang-undang imigresyen deka diteritka agi ngambika raban orang ari Semenanjung Malaysia ti ngembuan ulah begedika bansa enggau batang pengarap bansa bukai enda tama ke Sarawak,”ku iya.
Adenan mansutka jaku tu ba sebengkah aum enggau pengarang berita ke diatur genap 100 hari iya nyadi Kepala Menteri di Wisma Bapa Malaysia ditu, kemari.
Iya nambah, laya 31 Mei 1969 enda kala nyadi di Sarawak ke alai penusah nya nyadi jauh ari nengeri tu.
Ku iya, genggam pemaik penyerakup enggau pengelantang pengidup kitai di Sarawak baka ke udah, lalu chara ke pemadu manah dikena nentuka pekara nya diintu iya nya nengah chara nagang sida tama ke Sarawak.
“Raban orang nya enda ngembuan runding enggau ulah ke sama baka kitai di Sarawak.
“Undang-undang imigresyen deka diterit lalu kitai chukup untung ketegal ngembuan hak nya,”ku iya.