KUCHING: Raban pakar enggau orang akademik kelebih agi ari Gerempung Produksyen Jelu Malaysia (MSAP) ditesau ngambika pansut mantaika produk dagin enggau manuk organik dikena napi peminta mensia mayuh jam ke diatu.
Menteri Pemansang Infrastruktur enggau Penyambung Dato Sri Michael Manyin Jawong madah, jam ke diatu peminta mensia mayuh ke moden ngagai produk nya chukup mayuh.
Iya madah,diatu majak mayuh rayat ba menua tu nemu sentang pengerai ba sukut pemakai kelebih agi ungkup sayur organik.
Tang baka ni ku enggau asil ari jelu baka telu organik, manuk organik, dagin babi organik, dagin chapi enggau utai bukai.
“Aku ngasaika tu siti pemar ke patut digaga MSAP sekalika sida ulih ngasilka jelu organik tauka sayur organik aja,” ku iya.
Iya madah munyi nya rambau pengerami makai malam beserimbai enggau Aum Gerempung Produksyen Jelu Malaysia (MSAP) Ke-35 enggau Aum Pasal Produksyen Jelu Menua Asean Keterubah ke bela digulu Presiden MSAP Dr Abu Hassan Muhammad Ali ditu, malam ensana.
Manyin berebak enggau nya mega ngasuh gerempung ke besangkut paut nyediaka produk ke lebih mudah ngagai orang ke meli seraya ngarapka orang tengah bulih penguntung enggau nadai rugi.
Beguna amat endur mensia mayuh berundingka chara dikena ngurangka ungkus belanja ngambika pemeli enda balat ngasaika diri kena tating ungkus belanja,” ku iya.
Nangkan ke nya, Abu Hassan ba jaku iya madah, kaban gerempung nyengkaum sida ari opis perintah, kompeni ke besangkut paut enggau perintah, kompeni pribit kelimpah ari universiti.
Iya mega minta raban orang enggai kompeni ke deka masuk gerempung nya nyerungkai peluang enggau penau sida.