Anda di sini

GCR14 disambut berengkah 20 -23 Jun

Advertisement

KUCHING: Gawai Karni­val Redeem 2014 (GCR14) ungkup taun kesemilan deka nyediaka mayuh macham pengawa, adat sereta main asal sepengelama empat hari berunggu berengkah 20 nga­gai 23 Jun 2014.

Presiden Redeems Datuk Peter Nansian madah GCR14 diatur besai agi ari taun ke udah ke alai gawai nya deka ngundang pengabang ke pe­madu dipebasa Tuai Pemegai Menua (TYT) Tun Pehin Sri Abdul Taib Mahmud sereta Sapit Menteri Besai Tan Sri Dato Sri Muhyiddin Yassin.

Nyempulang pengabang ke dipebasa ba malam pengerami kena 23 Jun, Kepala Menteri Tan Sri Datuk Amar Ade­nan Satem lalu GCR14 deka dipenyadi TYT ke alai iya deka mangkung tawak tujuh kali.

“Pengudah Menteri Besai Datuk Seri Najib Tun Ra­zak ngabang ngagai menua utara Sarawak rambau kitai ngintu gawai taun tu, sapit iya Muhyiddin deka ngabang ngagai kitai di selatan lalu rumah panjai Bidayuh dipilih ungkup taun tu.

“TYT, Muhyiddin enggau Adenan deka berami ngintu Gawai enggau semua bansa Bidayuh ari Serian, Padawan, Bau enggau Lundu di rumah panjai ke baru udah tembu digaga di Palan Redeems, Kpg Apar Bau,”ku iya ba seiti aum pengarang berita kemari.

Iya ke mega Chairman Komiti Ngintu GCR14 ma­dah, rambau empat hari pengerami, adat enggau main asal bansa Bidayuh deka dibantaika ngagai bala penga­bang ke alai Kelab Main Asal ari sekeda genturung pendiau diundang ngemujur pengawa nya.

“Baka ke suah, Pekit Ku­mang ‘Dayung Sikora’ deka diatur lalu pemutus deka ditemu ba malam nyadi.

“Kelimpah ari nya, ijinsi ke dikuasa perintah besai deka datai lalu sida deka bekenaka awak nya meri penerang nga­gai mensia mayuh sentang ser­bis ke bisi disedia,”ku iya.

Nansian ke mega Menteri Muda Pemansang Komu­niti sereta Menteri Muda Pemansang Industri Estet nambah, malam nya mega TYT deka ngemujur pengawa mantaika perambu Palan Main Asal Redeem.

Iya nambah tembu ila, pa­lan nya dibuka ngagai semua bansa ti deka ngadu pengawa main asal.

 

Advertisement