Dikarang Chris Bishop
KUCHING: Penyampau pemeri tambah ari asil minyak enggau gis ungkup Nengeri Sarawak patut ngelui ari agih belanja ungkup pengawa pemansang ke suah diberi ngelama tu, pia ku Kepala Menteri Tan Sri Datuk Amar Adenan Satem.
Taja pia, iya netapka pemeri tambah nyadi sebengkah pemeri ke enda patut disengkaum dalam agih belanja ari perintah besai ke diberi ninting taun.
“Aku lantang ati pengudah perintah besai setuju berundingka pinta kitai ba senentang nambahka royalti ari asil minyak nengeri tu.
“Pekara tu ulih dikemujur ketegal kededua perintah nengeri enggau perintah besai diarika Barisan Nasional (BN) ke alai aku pechaya pekara tu ulih diputar.
“Penyampau pemeri tambah nya patut ngelui ari agih belanja ungkup pengawa pemansang ninting taun ke diberi perintah besai ngelama tu. Kitai enggai meda jari sepiak meri utai ke baru, jari sepiak agi ngambi pulai pemeri ke lama,”ku tandu iya.
Iya mansutka penerang tu ba aum enggau pengarang berita nyerumba 100 hari pengudah mangku pengawa nyadi Kepala Menteri di Wisma Bapa Malaysia ditu, kemari.
Enda ngira sekalika pemeri nya ari atur royalti, equiti tauka dividen, Adenan netapka Sarawak patut nerima bayar ke lebih ari ke udah.
Iya madah nengah bayar nya, pengawa pemansang kelebih agi di menua pesisir ke mengkang tinggal ari kandang nengeri ulih diadu enggau lengkas.
“Kitai nemu dia menua pesisir agi mengkang tinggal ari atur pemansang enti dibandingka enggau kandang mengeri.
“Ketegal nya, program pemansang di menua pesisir deka dikemerat. Tanah Sarawak nyauka bela pemesai enggau Semenanjung Malaysia lalu kitai ditu mengkang kurang ari atur perengkaguna baka ke jalai alun, bekal lekterik enggau bekal ai.
“Palan Pemansang Menua Pesisir (RGC) deka nyadi pun pemansang menua pesisir ti nyediaka mayuh peluang dagang enggau gawa sereta dikearap ulih nyekat pemindah peranak ari menua pesisir ngagai kandang nengeri,”ku iya.
Adenan mega pechaya nengah program pemansang ke engkeman sereta agih belanja ke chukup , pengawa ngemunas penyeranta ke seruran dikemerat sereta ulih dikemujur enggau lengkas.
Ku iya, 20 tauka 30 taun ke udah ikas penyeranta di nengeri tu chukup tinggi tang ikas nya udah mujur dikurang.
“Ketegal nadai peluang kereja, tebal agi peranak menua pesisir mindah ngagai kandang mengeri. Maya nya 70 peratus peranak Sarawak diau di menua pesisir lalu laluh 30 peratus di kandang mengeri.
“Diatu peratus nya udah bela lalu ketegal nya mega kitai keran nentuka menua pesisir di serata Sarawak dipejalai enggau lengkas.
“Enti udah bisi jalai, bisi bekal lekterik enggau ai, pemansang bukai deka nitih,”ku iya.