Dikarang Jacqueline David //
Pekara tu dipadahka Najib lebuh maya ngintu Malam Rumah Terbuka Malaysia Gawai Dayak di Miri
KUCHING: Peneka menua Sarawak ngulihka penambah ‘royalti’ minyak dijangka deka nerima pemendar ari Perintah Besai.
Malam Rumah Tebuka Malaysia Gawai Dayak 2014 ti di intu di Fan Square, Miri kena 2Jun tu tadi, Menteri Besai Datuk Seri Najib Tun Razak madah Perintah Besai deka nimbang peminta ke pengabis manah ungkup Sarawak ngulihka royalti tinggi agi asil minyak enggau gis ngagai menua tu.
Jaku Najib nya nerima timbal ke positif ari tuai pemesai menua ke ngasaika pekara bekait enggau royalti minyak nya endang patut diungkup pulai baru ke Sarawak tang dalam timpuh ke sama, nyaga kaul entara kededua buah sitak menua.
Menteri Pemansang Tanah Tan Sri Datuk Amar James Jemut Masing madah, iya beterima kasih ngagai Kepala Menteri Tan Sri Datuk Amar Adenan Satem laban udah mujur mai bala Kaban Kunsil Nengeri (ADUN) menua tu beserakup enda ngira penemu politik sida iya, minta ‘royalti’ minyak ke menua tu ditambah ngagai 20 peratus ke Sarawak.
“Tu pemun ke manah digaga Kepala Menteri , laban ngelama tu pekara tu bedau dipejuraika. Awakka tu nyadi pemun ke utai ti deka nyadi ila. Kitai sama-sama bediri beserakup ke penguntung Sarawak.
“Bida dalam politik patut diiyarka dulu lalu penguntung Sarawak patut dikemeratka dulu. Aku berasai temegah ati meda Perintah Besai deka berundingka peminta 20 peratus Sarawak nambah royalti minyak enggau gis kitai,” ku Masing ti mega nyadi Presiden Parti Rakyat Sarawak (PRS).
Udah nya, ADUN Balai Ringin Snowdan Lawan madah, Sarawak beterima kasih ngagai Perintah Besai enggau PM (Najib) laban seruran betatika pemerat Sarawak, ke dipadah iya PM bisi ‘soft spot’ ba Sarawak.
Kelimpah ari nya, Snowdan mega madahka menua tu mega patut beterima kasih ngagai Kepala Menteri (Adenan) laban udah mantaika pemerat tu ngagai Perintah Besai sereta bisi mega udah dibantai maya Aum Kunsil Nengeri (Aum DUN) ke-17 tu tadi, alai pekara tu dibantaika Snowdan empu, ADUN Semop Abdullah Saidol (BN-PBB) enggau ADUN Kota Sentosa Chong Chieng Jien (DAP).
“Enti nitihka teknikal, Sarawak menua ke pengabis besai di Malaysia, lalu iya begunaka ungkup ke besai kena ngemansangka serata menua tu. Pengarap kitai sigi besai lalu ngambika pemerat tu ulih diadu enggau jampat,” ku Snowdan lalu nambah, pemerat baka tu sigi patut diadu enggau jampat laban Sarawak entara menua Malaysia Timur ke nyadi ‘fixed deposit’ Barisan Nasional (BN).
Kaul ke manah entara Perintah Besai enggau Menua disalin ngagai pendiau ke menang-menang (win-win situation) lalu Sarawak patit diberi pan ‘khas’ baka tu, ngambika ulih ngaga mayuh agi pemansang di serata menua, laban Sarawak jauh tinggal ari menua bukai, ku Menteri Muda Pengerai Mensia Mayuh, Menteri Muda Nembiak (Menua Pesisir) ti mega nyadi Sekretari Besai BN Negeri, Datuk Dr Stephen Rundi anak Utom.
“Seagi-agi Perintah Besai meri kitai pan ke chukup kena ngaga pengawa pemansang baka ke diperambu kitai, nya pemerat menua ke bendar. Baik iya deka diberi kemaya tu tauka dalam timpuh ke panjai lalu ukai ni naka penyampau peratus ke deka diberi,” ku Rundi.
Dalam jaku Najib maya ngepunka Rumah Terbuka Malaysia Gawai Dayak 2014, iya madah Perintah Besai nadai sebarang penanggul tauka belampung ati deka berundingka pemerat enggau Sarawak bekait enggau pemerat menua tu.
“Perintah Besai deka nimbang pemerat ke pengabis manah (bekait enggau royalty minyak ke besai agi),” ku Najib.