SIBU: Pengerami Makai Malam Gawai Dayak Sibu 2014 ke diatur ba Hotel Kingwood ditu, empai lama tu tadi disempulang enggau mayuh bengkah program nyengkaum mandangka main asal.
Pengerami ti berambaika leka jaku ‘Segulai Sejalai Sepenemu’ serak tu diatur Sarakup Indu Dayak Sarawak (SIDS) Pampang Sibu lalu disaup SDNU Pampang Sibu, SDNU Pampang Rajang, SDNU Pampang Sibu Jaya enggau Gerempung Orang Ulu (OUNA) Pampang Sibu. Menteri Pemansang Rama Tan Sri William Mawan Ikom dipebasa bejadi pengerami malam nya.
Sama bela bisi datai maya tu iya nya bini Mawan Puan Sri Julia Mawan, Tuai Gawai Dayak Sibu 2014 ti mega Chairperson Serakup Indu Dayak Sarawak (SIDS) Pampang Sibu Ir Alice Jawan, Temenggung Sir Adrian Ringgau enggau Pemancha Stanley Geramong sereta bala pemesai ke bukai.
Mensia mayuh ke bisi datai malam nya diperindang enggau mayuh bengkah program baka dibantai enggau tanda sereta main asal, kuntau, lagu sepunsa, beperindang enggau artis Iban tebilang enggau Pekit Kumang enggau Keling Gawai Dayak Sibu 2014.
Kelimpah ari nya bisi 168 iku nembiak nerima Peransang Pelajar ketegal mujur ba UPSR (47), PMR (60), SPM (14) enggau STPM (47). Bereba enggau pengerami nya, Mawan bisi ngerahka bantu RM15,000 ngagai SIDS Pampang Sibu.