Dikarang Judan Bungap
SIBU: Bisi 43 iku raban Opis Penyah Penusah enggau Pengerara Api (Bomba) ari tujuh bengkah opis bomba ari baruh pegai Zon Sibu ngulu pengawa sembiang ungkup raban Keristin beserimbai enggau ngintu Hari Raban Bomba 2014, empai lama tu tadi.
Pengawa nya diatur ba Gerija Anglikan St John ba Jalai Tun Abang Haji Openg ditu.
Pengawa tu mega digulu Pemesai Pemantu Bomba Mutton Gelanggang.
Sembiang nya betuaika Vicar Gerija Anglikan Saint John Reverend Canon Jamal Senada lalu dibantu Deacon Reverend Doyle Owen Laccase.
Sepenembu pengawa sembiang nya, pemesai enggau raban bomba mega besaup meresi pendam enggau kandang gerija ari baruh Program Jiwa Murni.