Dikarang Judan Bungap //
GAYU GURU GERAI NYAMAI: Nanta (tengah) betuaika bala bukai ngeradak ai pengayu ti nyadi program ke penudi pengerami.
SONG: Koperasi Song Kapit Berhad (KSKB) udah mujur ngatur Pengerami Makai Malam Beserimbai enggau Aum Besai Ninting Taun enggau Mantar Gawai ba Balai Mensia Mayuh Song ditu, empai lama tu tadi.
Pengerami nya dipenyadi Sapit Menteri Pemansang Menua Pesisir enggau Kandang Menua Datuk Alexander Nanta Linggi lalu bela digulu Pemantu Direkter Suruhajaya Koperasi Malaysia (SKM) Beraim Hossen, Sekretari Politik Kepala Menteri Jefferson Jamit Unyat, Pemesai Pelilih Menua Song Jacqualine Ougos, Chairman KSKB Penghulu Baling Jengin enggau Sekretari KSKB Catherine Nain Abit sereta bala raban KSKB ke bukai.
Ba pengerami tu Nanta dipebasa nyuaka replika cek RM63,141.50 ngagai KSKB, penyampau dividen ke dibagi ngagai 77 iku raban.
Udah nya iya nyuaka peransang pelajar ngagai anak raban KSKB ke bulih pemutus peresa ti manah taun seiti suba.
Ba jaku iya, Nanta meri puji ngagai KSKB laban serak tu mujur nyuaka 100 persin dividen ngagai bala raban sida.
Ku iya, pemujur nya endang bepun ari pemanah chara megai sereta disempulang pengeransing enggau kerejasama bala raban gerempung.
Iya ti mega Kaban Parlimen Kapit ngarapka ulah nya ulih dikemeranka belama.
Kelimpah ari nya, Nanta ngarapka KSKB ulih berundingka dagang bukai dikena nyungkakka agi tikas penguntung koperasi sida.
Berebak enggau pengerami nya mega iya bisi nyuaka geran RM88,000 ngagai semilan iti gerempung ukai dikuasa perintah (NGO) ari raban bansa China ba pelilih nya.
Sida ke nerima geran tu iya nya Lembaga Pengurusan SJKC Hin Hua, Kelab Lions Song, Komuniti 1Malaysia Kampung Cina Song, JKKK Kampung Cina Song, Gereja Methodist Sang En, Persatuan Buddist Song, Tadika Semarak, Hock Ann Hoe Benevolent Society enggau Persatuan Foochow Song.
Kelimpah ari nya, Kelab Rekreasi Opis Pemadah Song mega bisi nerima geran RM7,000 ari Nanta.