KUCHING: Opis Jil Malaysia (JPM) benung chakah bejalaika transformasyen nengah Institut Penjara bererengat ditukar nyadi Institut Koreksional, senipak enggau juluk manggai taun 2020 ulih nyendiaka penuh servis Koreksional.
Sapit Menteri Dalam Nengeri, Datuk Dr. Wan Junaidi Tuanku Jaafar madahka, naka ke diatu transformesyen nya nerima sukung sereta dipejalaika berenggat di rumah jil serata menua.
Iya madahka, nya nunjukka opis tauka rumah jil serata menua betapi enggau pemar besai dibandingka enggau sebedau tu semina ngetan enggau nyaga orang jil aja.
“Pekara ti chukup dikemeratka aku iya nya transformasyen ti dipejalaika piak opis jil beberapa taun ke udah, ti nukarka Institut Penjara nyadi Institut Koreksional.
“Enti suba tanggungpengawa JPM semina nyaga tauka ngukum orang jil ti dianjung kot ngambika dijil nitihka timpuh udah ditetapka tang diatu dipejalaika nengah chara strategik baka ngerai, meri kaunseling, latih pengelandik, pelajar enggau mayuh ke bukai.
“Kitai ngarapka JPM deka nyata nyadi Institut Koreksional lebuh manggai taun 2020 ila, ti dipejalaika bererengat ari diatu,” ku iya bejaku dalam aum pengarang berita.
Dulu ari nya Wan Junaidi meri sereta bejadi Majli Pemakaian Pangkat Time-Based Berasaskan Kecemerlangan (TBBK) Koperal dan Sarjan Jabatan Penjara Malaysia ti diatur ba Auditorium Sri Sarawak, Indu Opis Jil Sarawak, Jalai Puncak Borneo ditu kemari.
Bejaku baru iya madahka servis koreksional ti dipejalaika nya ulih mantu raban orang jil lebuh pansut ari rumah jil jemah ila.
“Servis koreksional ti dipejalaika tu udah ngayanka pemanah iya nya lebuh penyampau residivis (masuk jil baru) taun 2013 bisi nurun ti ngerikodka 7.61 peratus. Lalu ngarapka penyampau residivis ila ulih manggai 5 peratus,” ku iya lebuh bejaku ba pengerami nya.
Wan Junaidi berindik ari nya ngelalau pemesai opis jil ti ditikika pangkat ngambika ulih betapi enggau tanggungpengawa ti lebih berat dikena nyapai juluk transformasyen nyadi institusi ‘pemansang tauka penempa baru modal mensia’.
Ba pengerami nya iya ngelekatka pangkat TBBK Koperal enggau Sarjan ngagai 291 Warder Penjara (KX17) enggau 72 Koperal Penjara (KX20) ari serata institusi nengeri tu.
Sama bisi datai ba pengerami nya kemari, Timbalan Ketua Pengarah Penjara (Pengurusan) Komisioner Penjara Datuk Wan Abdul Rahman Abdullah enggau Direktor Indu Opis Jil Sarawak, Penolong Kanan Komisioner Abd Kadir Rais.