KAPIT: Beratus mensia ngemenuhka Balairaya Song di pasar Song ditu laban bela deka nemu penerang ke dibai Opis Pengereja Pengawa (JTK) Sarawak pasal bengkah pengawa ti begunaka pengereja.
Ari pemayuh mensia, bisi ke baru tembu belajar Pom Lima, Pom Enam sereta bisi mega ti baru bulih degree kelimpah ari raban ke tuai beumur entara 40 enggau 55 taun lalu tebal sida minta pengawa di kem batang.
Bisi sepuluh buah kompeni ngulu atur penerang pasal pengawa puang nya.
Kompeni ke bisi mandangka penerang iya nya, Ironwall S/B, Kintameru S/B, JayaTiasaBerhad, Ta Ann Plywood S/B, BanyangTimur S/B, Hariwood, Press Metal Sarawak, Emart Group of Companies enggau SuburTIasa Holding.
Kompeni batang begigaka orang deriba lipan, mekanik, ‘operator chain saw’, survei, deriba terak sereta pengereja pengawa ladang.
Press Metal Sarawak begigaka mekanik, injinir sereta Emart Group of Companies begunaka kerani sereta pamantu bejual barang.
Kena ngemujurka atur pengawa, bisi 15 iku pengereja pengawa ari JTK Kapit ti diketuaika Khusyairy Pangkas Abdullah sereta sapit iya Richard Sandak.
Khusyairy madah, tu mih penyakah JTK mantu mensia mayuh ngulihka pengawa.
“Nengah atur pengawa tu mega, kami nyaup kompeni ngulihka pengereja pengawa lalu pia mega mensia ti begigaka pengawa dikemuntang bulih pengawa,” ku Khusyair
DO Song, Jackline August mujur bejadika atur pengawa nya.