BINTULU: Balai Dagang Dayak enggau Industri (DCCI) deka nyadi tuai rumah ngintu pengerami DCCI-KCCI Gawai-Kaamatan 2014.
Penyanding Penemu DCCI ke mega Chairman pengatur pengerami, Tan Sri Celestine Ujang Jilan (gambar) madah, DCCI enggau Balai Dagang enggau Industri Kadazandusun (KCCI) begempung ngatur pengerami ke diintu ninting taun nya nengah chara begintir.
Ku iya, keterubah endar taun tu pengerami nya diatur di Rh Michael Ding, Sg Sekutan Sebauh kena Hari Enam, 28 Jun ti berambaika leka jaku ‘Rural Economic Transformation Through Cultural Intergration’.
Semua kaban ari kededua balai dagang diperansang datai ke alai pengerami nya deka nyadi palan ari dua bengkah balai dagang nya besilihka penemu, peneleba sereta ngemanahka kaul.
“Ke beguna amat, peluang nya ulih ngenegapka penyerakup bansa enggau intergrasyen nengah pengawa begulai sereta berandau enggau pangan diri maya pengerami nya ila,” ku Ujang.
Kepala Menteri Tan Sri Adenan Satem enggau bini iya Puan Sri Dato Jamilah Anu mega bisi madahka pengingin diri ngulu pengerami ke deka berengkah pukul 4.30 lemai nya.
Maya pengerami nya mega bisi mantaika main asal ari pengari DCCI enggau KCCI dikena merindang bala temuai maya nya ila.
Sekeda atur pengawa ke dibantai lemai nya ila ila, bala Kumang Gawai enggau Unduk Ngadau Kamaatan ti deka berintai ba atas panggau ngena ngepan etnik sida.
Urung 3,000 iku mensia sereta temuai dipelaba ngulu pengerami nya nyengkaum kaban KCCI.