Sekeda ari sida tu udah bulih Masters, Degree enggau Diploma dipelanja ngena Tabung Amanah Bakun
Dikarang Jacqueline David //
KUCHING: Penemu aktivis tauka gerempung ukai dikuasa perintah (NGO) ti madah, perintah enda ibuhka pengidup bansa Penan it dipindah ketegal hidro Murum, nya enda amat ku Menteri Pemansang Tanah Tan Sri Dr James Masing.
“Sekeda aktivis tauka NGO di menua tu enda ngelala pengawa ti dikereja perintah mantu nembiak bansa Penan ngemansangka pelajar sekula.
“Endang amat, indah kitai pan patut ngiga chara ngemanahka program ti baka tu ngambika nembiak Penan tau muka runding kena napi pengidup ba abad ke-21 tu,” ku iya.
Masing ti mega chairman Tabung Amanah Bakun (TAB) madah, pemayuh wang turu nya bisi RM10 juta ke udah dikena mantu 2,000 iku nembiak Penan tauka Orang Ulu ke diau di sitak nya, mai penguntung ngagai nembiak Orang Ulu
ke diau di sitak nya, lebih agi mayuh ke udah belajar ba Palan Pelajar Tinggi (IPT) ke udah bulih Masters, Degree enggau Diploma.
“TAB udah melanja urung RM10 juta tang laban chara TAB nya melanja enggau bekelimat, laluh ke tinggal nyengkaum sekeda aset pemisi TAB agi bisi dalam kandang penyampau RM10 juta.
“Diatu pan aku nguji ngulihka wang turu ungkup TAB, laban ba penemu aku, TAB udah ngaga pengawa ke pengabis manah dalam pekara Projek Elekterik Hidro Bakun (BHEP) ke meri penguntung ngagai mensia mayuh ke diau di Belaga.
“Kitai bisi orang ke bepengelandik di Belaga lalu ketegal TAB, ke nyadi pemerat nya, aku mega ngarapka ulih ngiga wang turu ke Murum kena nambah TAB, laban nya chara mai nembiak Penan ngemeratka pekara pelajar,” ku iya.
Urung 27 nembiak ari Murum ti betuaika Romio Ding bisi dibai nemuai ngagai Kuching meda sekeda palan pelajar pengelandik ke bisi di menua tu kelimpah ari meri kelala ngagai sida iya, ngambika sida iya nemu pemerat pelajar.
“Enti kitai merati timbal entara sida nembiak Penan tu, lantang endar ati meda sida iya beratika utai ke baru ngelingi sida iya lebuh nemuai ke mengeri.
“Nya alai, enti ulih kompeni besai baka Sarawak Energy Berhad (SEB) dikearap ulih meri belanja mimit ngagai TAB, laban naka kediatu kami lalu bedau bulih ari SEB,” ku Masing.
Kelimpah ari nya, iya mega madahka sigi udah nyadi tanggungpengawa Perintah deka ngemansangka modal mensia ke bisi penemu, pemandai sereta pengelandik.
“Laban kitai deka meda nembiak Penan ulih mantu proses pemansang Murum nyadi sebuah palan ke deka ngangkatka ekonomi mensia mayuh ke diau di sitak nya.
“Enggau pemisi SCORE, deka ngangkatka ekonomi menua tu kelimpah ari meri peluang ngagai rayat di menua pesisir laban kitai deka nyapai status menua bepemisi besai,” ku iya.
Sebedau nya, ketuai Kelab Belia Belaga Sarawak (KBBS) Romio Ding ke nguluka 27 nembiak Penan nemuai ke Kuching madah, berindik ari program ke udah digaga Palan Latih Proaktif, Opis Pemansang Menua Tengah Sarawak, TEGAS, Kolej Sunway Kuching, Institut Perguruan Kampus Batu Lintang, SEDC, enggau Alvin Leong Photography Academy mai nembiak Penan nemuai ke Kuching, sereta keterubah iya diatur TAB, peneleba nya deka nyadi lalau sereta tenggau sida iya, ngangkatka pekara pelajar, sereta pengelandik ba nembiak Penan.
“Program ke dipeda kami proram ke deka mai peguntung sereta meri peluang ngagai bala nembiak Penan beratika pelajar pengelandik ke ulih digaga sida iya jemah ila,” ku Romio lalu ngarapka peneleba ke di ulih sida iya deka dikerembaika ngagai nembiak Penan bukai.
Sama bisi ngulu atur pengawa nya kemari, Chairman Palan Latih Proaktif Dato Seri Bernard Tan, Direktor Opis Pemansang Menua Tengah Sarawak Zaid Mat San, Ketuai Pemesai Operasyen TEGAS Awangku Merali Pengiran Mohamed enggau sekeda pemesai ari palan pelajar akademik bukai.