Dikarang Judan Bungap
SEMAMPAI DIKENANG: Salang (tiga kiba) nyua pemeri ari Linus (dua kiba) ngagai Nyayang maya bejadika bup nya ditu, empai lama ke udah.
JULAU: Sebuah bup nusoi cherita ti amat nyadi ba pengidup soldadu bansa Iban dalam Rajang Area Security Command (RASCOM) urung taun1990 suba udah mujur tembu dikarang.
Bup ke benama ‘Nyayang Bujang Berani’ tu dikarang ex- LT.Kol. Linus Lunsong Janti dalam pengelama dua taun sebedau belabuh dijual berengkah diatu.
Bup nya nusi pemerani ex-Kpl.Nyayang anak Angi enggau bala bujang berani bukai maya ngelaban munsuh komunis suba.
Taja ngembuan langkar tubuh ti numbas pemesai tang Nyayang dipadahka seiku soldadu Iban ke berani, landik, pintar nyidi munsuh maya menua siga suba lebih agi maya di Kanowit, Machan, Bob, Menyan, Batang Rajang.
Maya sebengkah pengerami endur bejadika bup tu empai lama ke udah, Linus madah, iya enda sanggu ngarang cherita nya laban endang bepun ari pekara ke udah nyadi.
Nambahka nya, iya mega kala gawa nyadi ketuai Special Branch Probing Unit (SBPU) ba RASCOM lalu Nyayang enggau Sgt Sigai ti kala nerima Pingat Gagah Berani (PGB) bela dalam tim nya taun 1976 ngagai 1977 suba.
“Maya belaban enggau munsuh kelia, soldadu kitai Iban endang bisi ‘utai’ dikena ngembar tubuh.
“Baka enggi Nyayang, ba belakang iya meruan abi semilan leka sterum nyentuk ke diatu bekau betimbak enggau kominis di Lajan, Nanga Entabai suba.
“Tang sayau bendar agi bisi bala bujang berani kitai Iban baka Nyayang tu empai dikelala semua orang lebih agi rebak baru ke diatu,” ku iya ti udah kala ngarang empat buah bup ke bukai ti bela nusoi cherita soldadu.
Linus madah, sida tu mega baka bujang berani ke bukai tang enda tampak rita.
Maya pengerami bejadika bup tu, Kaban Parlimen Julau Datuk Joseph Salang Gandum muji pengawa Linus ke udah bebendar ngarang bup nya laban deka bekunsi cherita ti amat nyadi ba soldadu kitai Iban.
Nambah ke nya ku iya, bup tu engkeman bendar dibacha raban nembiak ngambika sida nemu enggau silik senentang sejarah soldadu bansa Iban nyaup munaska raban penyelawai komunis di nengeri tu suba.
“Taja soldadu bansa Iban mit pangkat maya nya tang sida jauh agi berani kelimpah ari landik nyidi munsuh dalam babas.
“Aku berasai gaga ati laban bisi kitai Iban diatu baka Linus ngembuan pengerindu ngarang cherita tauka ngaga bup baka tu ngambi anak uchu kitai diatu nemu cherita ke amat nyadi dulu suba,” ku Salang.
Bup tu berega RM25 sebuah lalu tau ditanya ba Linus empu nengah lumur 019-8272 505 laban bup tu nadai dijual sebelah kedai bup di pasar.