Dikarang Jacqueline David
Sida tu ngembuan pengerindu sereta deka belajarka pekara teknikal enti diberi peluang: Talib
KUCHING: Seraban 27 iku nembiak bansa Penan ari sitak Murum, Belaga bepeluang ngelawa Bandaraya Kuching seraya mendingka licha pengawa pengelandik ti diatur Sarawak Economic Development Corporation (SEDC).
Chairman SEDC ti mega Menteri Muda Dagang Temuai Datuk Talib Zulpilip lebuh dikerandau madah, Program Bejadika Penemuai seraya Belajar Nembiak Penan Murum (PPLSBBPM) tu meri peneleba sereta peransang nyerumba penemuai sida ke mengeri lebih agi lebuh beratika chara orang di mengeri gawa ngena kereban moden.
“Tu peneleba sereta penemu ti keterubah diatur ungkup nembiak bansa Penan ari Murum, ngambika sida iya tau belajar kelimpah ari nimba pengelandik ti beguna,” ku Talib.
Nembiak Penan ke datai ari Murum nya dipelanja Tabung Amanah Bakun (TAB) ti betuaika chairman gerempung nya, Tan Sri Dr James Jemut Masing begulai enggau Kelab Nembiak Belaga Sarawak (KBBS) ke ngembuan juluk meri peluang ngagai sida ngulihka penemu sereta nambah peneleba ngambi tau meransang sida ngulihka penemu sereta pengelandik teknikal.
Penemuai tu diatur entara kerejasama SEDC enggau TAB ti keterubah kedsedua ejensi nya, ke endur nembiak Penan meda sereta ngelala bagi pengawa ti dikereja SEDC baka Hotel Riverside Kuching sereta palan pengelandik SEDC ke bukai.
Nitih ku Pemesai Pengatur Pengawa TAB ti mega chairman KBBS Romeo Ding, mayuh ari nembiak Penan ke dibai nemuai ke Bandaraya Kuching tu berumur entara 14-27 taun, tembu besekula (semina naka Pom Tiga ke pengabis tinggi pelajar) dibai meda palan pengelandik menua tu ke peransang sida iya belajar udah tu ila.
“Kami deka mai nembiak Penan tu meda sekeda palan pengelandik di Bandaraya Kuching tu, ngambika sida teperansang deka nyambung pelajar pasal pekara teknikal sereta pengelandik bukai.
“Kos baka tu engkeman ungkup sida ngambika jemah ila tembu ngulihka pengelandik sida tau ngereja pengawa seraya nyungkak penatai pemisi ruang bilik diri,” ku Romeo.
Raban nembiak tu tebal datai ari tiga buah palan pengentap pendiau baru di Murum.
Mike Jhun Ubin, 23, ari Long Malim Kenyah (K) madah, tu keterubah iya nemuai ke Kuching. Taja pan kala gawa ba kebun sawit tiga taun tang diatu Mike madah, iya deka nyambung pelajar ba palan pelajar ke nganjar bidang teknikal.
“Program tu endang manah laban meri peneleba ngagai kami meda pemansang mengeri Kuching.
“Enti bepeluang nyambung pelajar, nadai kebuah enggai laban aku bisi ati deka numbuhka ladang sawit enti aku udah ngembuan penemu sereta pengelandik ti dikedeka,” ku Mike.
Anak Tuai Kampung Long Malim Penan (P), Bekarin Asan, 18, berasai temegah laban bepeluang nembuai meda mengeri, pan sama penemu enggau Mike madahka enti bisi peluang belajar, iya deka nyambung belajar baru.
Chinliya anak Rundang, 27, ke gawa ba Opis Pelilih Mit Sg Asap, Belaga (nyaga pekara Penan) madah, pejalai sida ke Kuching muka runding sereta meri penemu ngagai semua seraya madahka penyarang rembus ke mengeri besai.
“Program tu endang amat manah sereta patut diatur di Murum ngambika sida ke bukai sama ulih mending lalu nyangka tau muka runding sida ti deka ngemansangka diri empu,” ku Chinliya ke datai ari Uat Tegulang, Murum.
Ke diatu, komunti Penan ke udah dipindah ngagai skim pengentap pendiau baru mungkur sitak Tegulang (dua buah rumah panjai) enggau di Metalun (4 buah rumah panjai) lalu semina Long Pran enggau Long Jack ke bedau dipindah laban ngenuluka sida ke dikeruga hidro Murum.