Dikarang Judan Bungap
MINTA BEREKAT: Komiti Gerempung Apai Indai enggau Pengajar (PIBG) benung miau piring minta perening petara ngulihka pemujur sekula nya.
SIBU: Sekolah Menengah Kebangsaan (SMK) Luar Bandar No. 1 Sibu (SMKLBS) udah ngatur tiga bengkah program berebak dalam kandang sehari kena 24 Mei tu tadi.
Program nya digulu raban bala apai indai kelimpah bala nembiak RIMUP (Rancangan Intergrasi Murid Untuk Perpaduan) ari SMK Jalan Oya.
Dikena ngepunka program, kira 500 iku bala apai indai ke bisi datai besaup meresi kandang sekula baka nebas rumput ba buding, nanam bungai enggau ngemanahka perengka ba buding.
Ba jaku iya, Kepala Pengajar Wong Teck Ling ke baru datai ngajar ba sekula nya empai lama ke udah madah, iya berasai temegah ati meda kaul antara apai indai enggau sekula nya.
Ku iya, sukung ti rat ari bala apai indai ngembing nempa pemujur ba sekula.
Wong mega maya tu nguji bejaku Iban ngarapka bala apai indai enggau pengajar semampai ulih bekerejasama nentuka pemujur pelajar anak dudi hari.
Nangkan ke nya, pekit ‘bola jaring’ enggau ‘bola baling’ mega bisi diatur antara dua buah sekula nya.
Ba pemutus pekit, SMKLBS mujur nyadi champian ba pekit ‘bola jaring’ lalu SMK Jalan Oya champian ba pekit ‘bola baling’.
Penembu program sehari nya dikelai enggau pengerami Mantar Gawai ke disempulang enggau macham bengkah pengawa merindang ati.
Sekeda ari pengawa ke bisi diatur baka mandangka kajat Iban, bebiau enggau ngerebahka ranyai.