BALAT DIKEMEGAH: Sapit Kepala Menteri Datuk Patinggi Tan Sri Alfred Jabu ngelaluka pemulai Taib ari Kuala Lumpur.
KUCHING: Tuai Pemegai Menua Tun Pehin Sri Abdul Taib Mahmud enggau bini iya, Toh Puan Raghad Kurdi Taib mujur datai di Penyangkai Bilun Antarabansa Kuching (KIA) urung pukul 4.40 lemai kemari.
Beratus mensia nyengkaum menteri kabinet nengeri, menteri muda, ketuai raban bansa , enggau kaban belayan sereta purih Taib nganti penatai Yang Dipertua Negeri Sarawak ti Ke-7 pemulai iya nerima gelar ‘Tun’ ari Yang Dipertuan Agong Tuanku Abdul Halim Mu’adzam Shah di Balairong Seri Istana Negara, Jalai Duta, Kuala Lumpur, dua hari ke udah.
Atur pengawa meri gelar ke pengabis besai menua nya sama digulu Raja Permaisuri Agong Tuanku Haminah, Menteri Besai Datuk Seri Najib Tun Rzak enggau bini iya, Datin Seri Rosmah Mansor, Sapit Menteri Besai Tan Sri Muhyiddin Yassin, Kepala Menteri Sarawak Tan Sri Datuk Amar Adenan Satem enggau bini iya, Puan Sri Datuk Jamilah Anu enggau bini Taib, Toh Puan Raghad Kurdi Taib.
Kena 1 March tu tadi, Taib besumpah mangku pengawa nyadi Yang di-Pertua Negeri Sarawak Ke-7 udah iya ngelengka pangku pengawa nyadi Kepala Menteri kena 28 Februari tu tadi.
Taib udah mangku pengawa nyadi Kepala Menteri dalam kandang 33 taun belabuh ari 26 March 1981 nganti penuduk aya iya, Tun Abdul Rahman Ya’kub.
Anak tuai ari 10 iku diri menyadi, anak Mahmud Abang Yahya enggau Hamidah Ya’kub nya ada kena 21 Mei 1936.
Taib kala gawa nyadi akim ba Kot Besai Australia Selatan pengudah iya ngabiska pelajar dalam pekara undang-undang di University of Adelaide, sebedau pulai ke Sarawak.
Iya masuk pengawa politik dalam taun 1963 lebuh nyadi raban Kunsil Pengawa Undang-undang Nengeri Sarawak datai ngagai taun 1966.
Nangkan nya, iya lalu dipadu mangku pengawa nyadi Menteri Penyambung enggau Kereja Raya ari taun 1963-1966 lalu udah nya mangku pengawa nyadi Menteri Pemansang Kampung.