KAPIT: Kaban Kunsil Nengeri (ADUN) Pelagus, George Lagong madah pemutus iya tama TERAS ukai deka ngemedis tang mantu rayat.
Aku udah malutka diri ba politik ngelama 30 taun diatu. Keterubah aku malutka diri ba politik kenyau ari aku beumur 23 taun, lalu diatu aku udah 54 taun. Ngelama tu aku udah ngasaika pemar enggau penyamai dalam politik . Aku udah betapi enggau semua pemar. Diatu aku udah enggau TERAS, pemutus tu ukai deka ngemediska rayat. Aku nemu tunga kuing diri,” ku iya madah ngagai pengarang berita.
“Awakka kami ngarika rayat ba pekara politik,” ku George nyaut lebuh ke ditanya senentang pemutus ke diambi PRS maya Aum Besai ke diatur entara sitak N 54 Pelagus, N 55 Katibas enggau N 56 Baleh ba Meligai Hotel, ke alai maya nya PRS kering penemu ngenggaika George Lagong tama ngagai TERAS seraya madahka sitak N 54 Pelagus endang enggi PRS.
“Dalam politik, kami engka bisi bebida penemu tang kaul kami tetap manah,” ku iya madah lebuh ke ditanya senentang kaul iya enggau SWP, ke alai iya kala nyadi Sapit presiden parti nya sebedau tu.
“Aku ulih mutarka semua nya kenyau ari aku dipilih nyadi pengari rayat sitak N 54 Pelagus. Diatu, aku ngena peluang tu masuk TERAS ke alai peluang nya datai tekala nya. Lebuh TERAS diterima masuk ngagai BN, sebarang pengelebih enggau penguntung nyengkaum belanja MRP, ulih dikena aku bejalaika servis dalam sitak aku”, ku iya madah senentang pemutus iya ke tama ngagai TERAS.
George Lagong udah meri basa ke tinggi ngagai Kepala Menteri, Tan Sri Datuk Amar Adenan Satem, “Nengah pemintar Kepala Menteri Adenan Satem, kami arap endar ati Kepala Menteri ulih ngiring Sarawak nengah penyanyau, tampai jauh enggau penerit kuasa nyungkak pemansang ekonomi sereta nyerakupka rayat ”, pia ku iya.
Dalam kandang beberapa hari sebedau tu, George disempulang penyukung iya ngabas kandang sitak Pelagus.