LIMBANG: Pemanah sukung peranak menua ngagai pengari rayat nengah parti politik BN ngelama tu udah mai pemansang ngagai menua pesisir dalam sitak Kunsil Nengeri Batu Danau.
Menteri Pengatur Pemansang Pengeraja Asal enggau Rampa Menua II, Datuk Amar Awang Tengah Ali Hasan madah, nengah singkang ke betul udah ngujungka perintah BN ulih meri pemansang perengkaguna baka jalai alun,ai enggau karan ngagai rumah panjai di Limbang, taja pan agi mayuh utai bukai deka dipejalaika ditu.
Iya bejaku munyi tu lebuh ke nutup Pengerami Medamit ke mega Pengerami Mantar Gawai Renggat Pelilih Limbang di Nanga Medamit Limbang kena malam Hari Enam minggu nyin tadi.
Ku iya, pengari rayat Batu Danau, Paulus Palu Gumbang mengkang bebendar deka mai pemansang kena ngisi peminta rayat ba sitak nya nengah pelasar BN, seraya meransang rayat meri sukung ngagai iya.
“Iya nadai kala ninggalka SPDP tang iya ditingkil ari parti nya, lalu pekara pasal merejuk parti nadai nanggul pemanah rikod iya ngereja pengawa, laban iya enggau Batu Danau endang seruran ngempitka diri enggau BN ngelama tu,“ pia ku iya.
Tengah bejaku munyi tu ngenang pengari rayat nya ke mengkang enggau BN diatu taja pan iya begulai enggau empat iku pengari ke bukai ari SPDP, ngempung diri di baruh Kelab BN sebedau masuk parti Teras beserimbai enggau pengujung Aum Kunsil Nengeri (DUN) bulan nyin tadi.
Ex-presiden SPDP, Tan Sri William Ak Ikom nguluka lima iku pengari rayat ke mega ex-kaban SPDP masuk Teras, lalu Dato Sri Wong Soon Koh nguluka gerup iya ari sepiak SUPP milih singkang ke sama, ngambika sida majak ulih meri servis ngagai rayat ba sitak sida nengah BN.
Kepala Menteri Sarawak, Tan Sri Adenan Satem bisi mandangka sukung iya ngagai Teras tama ngagai BN,ke alai parti nya ila deka nyadi parti ti kedua besai dalam lanskap politik menua tu.
Tengah madahka BN Sarawak ngelaluka sukung ari rayat, lalu baka kes di Batu Danau, mayuh pemansang udah dipejalaika ba sitak tu berindik ari sukung ke manah ari rayat ditu.
Ku iya, Paulus enggau Batu Danau endang seruran di ati BN taja pan pengari rayat nya betapi enggau pemar politik lebuh ke ditingkilka ari SPDP, tang iya majak meri servis ngagai rayat nengah Kelab BN, lalu diatu parti Teras ke bekaban enggau BN.
Ku iya, BN mujur mai pemansang baka ti dikeinginka rayat di menua pesisir baka jalai alun, ai, karan enggau telekomunikasyen di Limbang, ke alai pemansang nya bisi tejanggal mimit ketegal enda chukup belanja laban rampa menua Sarawak ti kelalu besai.
“Mayuh utai udah dikereja kami tang kami enda ngeninggika diri, laban kami nemu agi mayuh utai ti deka dikereja kami. Enda baka penyakal, ti ngemegahka diri taja pan semina mimit aja utai ke dikereja sida di menua tu, “ pia ku iya.
Berebak enggau nya, Tengah ngungkupka belanja RM35,000 ke alai iya meri (RM 20,000), Asfia (RM 15,000) lalu Dr Rahman (RM 5,000) ngagai komiti pengatur Pengerami Medamit enggau Mantar Gawai 2014 ngambika bisi dikena sida bejalaika pengawa. Dulu ari nya Paulus udah ngungkupka belanja RM 30,000.
Tebal agi bala pengundi ba sitak Batu Danau iya nya bansa Iban enggau Bisaya. Pengerami Hari Gawai enggau Babulang diintu sereta, begulai enggau bansa bukai ke diau dia enggau ari luar pelilih mit menua nya.
Beserimbai enggau nya mega bisi diatur pekit Kumang Gawai ke alai Rossytha Belala Ak Kamar udah dipilih nyadi Kumang Limbang 2014 sereta nerima perais mata duit RM 1,000, selampai enggau trofi.
Stella Daniel ba lumur dua ditangkanka Elvera Samba Ak Entebang, ke alai seduai sama bela nerima perais mata duit RM 700 enggau RM 500 sereta tropi.
Bela bisi ngulu pengerami nya Speaker DUN Sarawak Datuk Amar Mohd Asfia Awang Nassar, ADUN Dr Abdul Rahman Ismail, Residen Limbang Maria Hasman, ketuai opis perintah sereta ejensi enggau ketuai raban bansa.