KUCHING: Gelar Tun ti diberi ngagai Tuai Pemegai Menua (TYT) Pehin Sri Abdul Taib Mahmud ari Yang Dipertuan Agong sehari tu tadi (kemari) endang setipak enggau pengawa sereta peneleba iya ke udah ngangkat sereta ngiring nengeri Sarawak manggai ba tikas pemansang baka ke diatu, ku Menteri Pengintu Pengelantang Pendiau, Orang Indu enggau Pemansang Ruang Bilik, Datuk Fatimah Abdullah.
“Gelar Tun setipak, patut diberi ngagai Taib bepelasarka peneleba iya, servis nyadi menteri kabinet ba renggat Perintah Besai, nyadi Kepala Menteri, ukai semina pengawa iya di nengeri Sarawak tang mega di semenanjung sereta sitak Asia Pasifik.
“Kitai beratika pengawa iya, kelalu mayuh sereta udah mai penguntung besai ngagai nengeri tu sereta rayat ukai semina rebak ke diatu tang nyentuk ke jemah ila,” ku Fatimah.
Iya madah munyi nya lebuh dikerandau pengudah nyadi chairperson aum media ‘Special Olympics Sarawak Kuching Chapter’ di opis iya ditu kemari.
Iya madah enti diperatika, Sarawak udah mayuh nerima pemansang ari atur pengawa Taib.
“Di Sarawak, kitai ngelala pengawa ke udah diatur Taib maya iya gawa nyadi Menteri ba renggat Perintah Besai, nyadi Kepala Menteri ukai semina di nengeri tu aja tang ba sitak Asia Pasifik sereta menua luar bukai.
“Semua pengawa ke diatur iya (Taib) meri penguntung ngagai kitai sereta nyentuk ke jemah ila. Iya seiku ketuai ke bependiau nyadi ‘legacy’, ke deka di keingatka kitai belama….Nya alai, gelar Tun nya sigi setipak ungkup,” ku Fatimah.
Taib mangku pengawa nyadi Kepala Menteri Sarawak ti ke-4 kandang 33 taun, kala nyadi presiden Parti Pesaka Bumiputera Bersatu Sarawak (sebuah komponen parti Barisan Nasional pengabis besai di Sarawak), mangku pengawa nyadi kaban parlimen (MP) Malaysia dalam kandang 38 taun.
Taib belabuh mangku pengawa nyadi Kepala Menteri Sarawak ari umur 45 taun (1981), lalu kena 12 Februari taun tu tadi iya nganjung surat ngagai Tuai Pemegai Menua Tun Muhammad Salahuddin (TYT Sarawak maya nya) madahka diri ngetu nyadi Kepala Menteri Sarawak kena 28 Februari 2014 lalu nangkan nya dipadu nganti Tun Muhammad Salahuddin nyadi Tuai Pemegai Menua Ke-7 kena 1 March 2014.
“Aku ngarika raban indu nengeri Sarawak, opis menteri kami enggau NGO ngajihka iya gerai belama berindik ari gelar Tun nya sereta besampi ke iya diberkat ‘Allah SWT,” ku Fatimah.