Dikarang Judan Bungap //
‘KAMI BESEMAYA’: Seraban bala pengajar maya nguluka bala bukai macha ‘ikrar’.
SIBU: Pengerami Hari Pengajar Renggat Nengeri Sarawak mujur diatur ba Hotel Kingwood ditu, kena 22 Mei tu tadi.
Pengerami ti berambaika leka jaku ‘Guru: Pencetus Kreativiti Dan Inovasi’ tu dipenyadi Menteri Pemansang Pengintu Pengelantang, Orang Indu enggau Ruang Bilik Datuk Fatimah Abdullah ngarika Kepala Menteri Tan Sri Datuk Amar Adenan Satem.
Maya pengerami tu, Datuk Dr Haili Dolhan enggau Datu Dr Adi Badiozaman Tuah nerima gelar Tokoh Guru Negeri Sarawak enggau Tokoh Kepimpinan Pendidikan Negeri Sarawak Tahun 2014.
NYADI CHUNTO: Datuk Dr Haili Dolhan (empat kanan), Datu Dr Adi Badiozaman Tuah (lima kanan) begambar begulai enggau Fatimah (tengah) sereta bala bukai pengudah nerima gelar Tokoh Guru Negeri Sarawak enggau Tokoh Kepimpinan Pendidikan Negeri Sarawak Tahun 2014.
Bela bisi datai maya tu iya nya Direktor Opis Pelajar Nengeri Sarawak Datu Abdillah Adam enggau Pemesai Opis Pelajar Sibu Wong Chong Kung sereta bala pemesai bukai.
Ba sekeda genteran jaku tangkan dalam teks jaku Adenan ke dibacha Fatimah, iya ngelalau raban pengajar di menua tu ngambika semampai megai tanggungpengawa ngajar nembiak sekula bemalinka peninggi penemu, pemanah basa sereta disempulang pengarap enggau chara idup ti menuku.
Nambahka nya ku iya, ba timpai runding mensia lebih agi ba nembiak sekula empu, raban pengajar ngembuan teladan ti signifikan.
Bala pengajar ke dikerami sehari nya mega diperindang enggau program bukai baka dipandang enggau tanda ari bala pengajar Sitak Sibu enggau koir lagu Guru Malaysia, Lagu Pendidik Bumi Kenyalang enggau Lagu Transformasi Pendidikan Negara.