KUCHING: Parti Sa’ati Rakyat Sarawak (SUPP) diatu nadai pampang opis di Engkilili laban opis ke sebedau tu udah diambi Parti Tenaga Rakyat Sarawak (Teras).
Ex- Sekretari SUPP Engkilili, Kaunsilor Nyambong Maweng madah ngagai The Borneo Post , SUPP nadai kuasa ba palan opis nya taja pan papan pal nya mengkang dia.
“Palan nya ukai diempu SUPP agi taja pan papan pal nya mengkang dia. Kami deka nanggalka papan pal nya enggau naka penyampat sereta nyilih ngena papan pal TERAS,” ku iya.
Ku iya, ex-kaban SUPP agi tau ngena palan nya taja pan sida udah ningkilka diri ari SUPP, laban palan nya disuwa Kaban Kunsil Nengeri Engkilili, Dr Johnical Rayong Ngipa lebuh iya agi nyadi Chairman SUPP Pampang Engkilili.
“Enti sema SUPP agi deka muka opis pampang Engkilili, sida tau nyuwa ba endur bukai. Bepanggai ba sida empu tang kami enda ngemendarka sida ngena opis lama nya,” ku iya.
Taja pia ku iya, dipelabaka SUPP enda numbuhka opis sida di Engkilili laban 1,000 iku kaban ke berijister enggau parti nya udah ningkilka diri nitihka singkang pengari rayat sida masuk TERAS.
Rayong seiku ari empat pengari rayat ke ningkilka diri ari SUPP kelimpah ari Dato Sri Wong Soon Koh (Bawang Assan), Datuk Dr Jerip Susil (Bengoh) enggau Ranum Mina (Opar) lalu masuk TERAS, sebuah parti ke baru ditumbuh sereta benung minta begempung enggau BN diatu.