SIBU: Bala tuai rumah ke gawa sereta ngiga belanja ba endur bukai enda tau enda mulaika diri ngagai rumah panjai diri pemadu nadai dua kali sebulan.
Sekretari Politik Kepala Menteri Andrew Shilling madah, bala tuai rumah kelebih agi ba sitak DUN Bawang Assan enda patut nejuka rayat sida ditinggalka ketuai kelalu lama.
“Bisi sekeda tuai rumah enda nguan rumah panjai laban ke ngiga belanja ba endur bukai baka di Bintulu, Miri enggau Kuching. Kami nadai nagang sida ngiga belanja.
“Taja pia, aku ngelalau tuai rumah ti dichiri kelebih agi ke gawa di Kuching, Bintulu tauka luar ari menua Sibu mulaika diri ke rumah panjai dua minggu sekali.
“Reti nya dalam sebulan kita patut mulaika diri ke rumah panjai dua kali dalam sebulan,” pia ku iya lebuh ke bejaku ba Pengerami Mantar Gawai Dayak 2014 DUN Bawang Assan ditu kemari.
Pengerami nya udah dipenyadika ADUN Bawang Assan ke mega Menteri Wang Kedua, Dato Sri Wong Soon Koh.
Ku Andrew, diatu rumah panjai mudah ditiki orang ti enda dikelala kelebih agi penyakal, enti nadai tuai rumah ngiring sida, peranak rumah panjai mudah agi tekuing runding mendingka jaku sida.
Ku iya baru, enti sesiku tuai rumah dalam sitak DUN Bawang Assan kelalu lama enda mulaika diri ngagai rumah panjai, servis sida tau diketuka.
Kuasa nyiri tuai rumah bepanggai ba pengari rayat enggau perintah.
“Enti sema sesiku tuai rumah enda ulih ngintu rumah panjai, agi mayuh orang bukai ti ulih mangku tanggungpengawa nya.
“Lebuh kita nyadi ketuai, kita anang enda mulaika diri ke rumah panjai sereta ngeripot penanggul ke ditapi peranak rumah panaji kita ngagai pengari rayat,” ku Andrew.
Kelimpah ari nya,iya mega madah bisi 35 iku tuai rumah ba sitak DUN Bawang Assan ke ulih disambung baru servis nyadi tuai rumah.
Lebuh ke ngenang sentang geran projek mit pemansang menua pesisir (MRP) ke disuaka maya pengerami nya, Andrew ngelalau peranak rumah panjai naruh nya dalam akaun Komiti Pemansang enggau Pengelikun Genturung Pendiau (JKKK).
“Ungkup belanja nya tau dikena bejalaika projek mit di rumah panjai baka ngechat, nyeruri atap, ngemanahka jalai enggau sekeda pengawa bukai,” ku iya.