Dikarang Jacqueline David //
SERIAN: Kandang sepuluh ngagai lima belas taun ari diatu, setipikit tauka penerang latih pengelandik ti diulih kita di sekula nyangka enda chukup dikena mandangka pengulih seseiku.
Menteri Pengereja Pengawa Malaysia (KSM), Dato Sri Richard Riot anak Jaem madah maya nya ila, pengelandik tauka setipikit enda chukup enti sema kita bisi degree, masters tauka pengelandik keretas bukai laban mayuh graduet ke dikeluarka palan pelajar tinggi (IPT) di menua tu kelalu mayuh enti dibanding enggau pengawa ke bisi disediaka perintah.
“Nya alai dalam pekara pengelandik, iya berat…Ke enda tentu pandai dalam akademik tembu Pom Lima tau minta masuk ngagai palan latih industri ke deka ngelatih kita,” ku Riot.
Iya madah baka nya lebuh bejadika Program AZAM Kerja 1Malaysia beserimbai enggau Gawai Mparing Sawa 2014 di Awah Gawai Tun Abdul Razak Kpg Pichin ditu, kemari.
Iya madah di Malaysia diatu, bisi 44 sub-sektor ke tau dipasuk, dilatih pengelandik ba pengawa ke muntang.
Ku iya, ari 14 juta orang gawa di menua tu, semina 28 peratus aja ke bepengelandik, 3.3 juta ke setengah bepengelandik enti dibanding enggau Singapore ke udah nyapai 52 peratus orang bepengelandik.
Iya madah, opis menteri nya (KSM) diberi tanggung pengawa ulih Menteri Besai (PM) nambah peratus nya ari 28 peratus ngagai 33 peratus manggai ujung taun tu.
“Nambah 5 peratus ke dipinta Perintah, iya nya ngembuan 33 peratus orang gawa ke bepengelandik manggai taun 2015, munyi nya mit tang enti disalin ngagai penyampau, penyampau nya besai, kebuah kitai patut ngelatih rayat kitai, 700 ribu nya dalam kandang 6 bulan,” ku iya.
Iya nandu baru, baruh program tu, 8 buah opis menteri diasuh nyapai penyampau nya.
“Peratus nya deka matih orang gawa kitai dalam pekara pengelandik ngagai 30 peratus, 70 peratus dibagi enggau 8 buah opis menteri reti nya kitai mesti ngelatih orang gawa kitai dalam penyampau 210,000 dalam kandang 6 bulan tu ila,” ku iya.
Kelimpah ari nya, iya madah ba pengawa ngelatih orang gawa menua tu nyadi orang ke bepengelandik bisi bekaul enggau Program Perintah ngangkatka tikas sosio-ekonomi pengelantang pendiau mensia mayuh.
Nengah Program Azam Kerja 1Malaysia, deka mantu ngambika penatai pemisi ruang bilik deka nambah, kelimpah ari mantu ruang bilik ke seranta dirijista nengah portal e-kasih.
“Enti bisi orang Kpg Pinchin ke madahka nama sida iya enda masuk lis dalam program e-kasih, anang nyalahka aku, salahka diri empu laban program tu digaga kena mantu orang ke seranta.
“KSM ngaga program tu enggau kami empu sama betemu enggau rayat ngambika rayat enda ibuh ngagai Opis Pelilih Menua tauka Opis Pemasang Menua.
“Ke enda nemu pasal program tu tauka sengaja enda nemu bakani pemerat program tu, aku sinu ke kita laban kita patut nemu pasal program tu,” ku iya lalu nadu, program tu digaga dikena nyungkak tikas sosio-ekonomi ruang bilik.
Kelimpah ari nya, iya ngelalau mensia mayuh ke gawa di genturung pendiau nya, ngisi ngagai PERKESO ngambika enti bisi sebarang penusah ke nyadi, ruang bilik ke ditinggal tetap dijamin.
“Mayuh ari kitai enda nemu pemerat kebuah kitai patut ngisi tabung PERKESO. Enti sema bisi sebarang penusah nyadi maya kitai gawa, nurun gawa tauka pulai ari endur gawa, kitai tetap dilindung PERKESO.
“Nya alai, aku minta saup tuai-tuai pupu raban bansa enggau ketuai genturung pendiau (KK) madah ngagai bala nembiak kitai enti sida iya gawa, betatika kompeni endur gawa nya bisi ngisi tabung PERKESO ke nyamin orang gawa ari sebarang penusah ke nyadi,” ku iya.
Entara ijinsi perintah ke bisi ngulu Program Azam Kerja 1Malaysia di Kpg Pinchin kemari, iya nya JTK, Opis Pemansang Pengelandik Sarawak (JPKWS), PERKESO, Opis Pengerai enggau Pengelikun Pengereja Pengawa Sarawak (JKKP), Palan Latih Industri (ILP), Palan Pengelikun Pengereja Pengawa Menua (NIOSH) Sarawak, ke semua ejensi tu baruh KSM.
Atur pengawa bukai ke bisi digaga beserimbai enggau Program Azam Kerja 1Malaysia, iya nya pekit main bol keterubah iya kala diatur di renggat Pelilih Menua nyerumba Hari Gawai.
Sama bisi ngulu atur pengawa nya, Sapit Kepala Sekretari Opis Menteri Pengereja Pengawa Datuk Romlee Hassan, Yang Arif Opis Menteri (Kot Industri) Gabriel Gumis, Direktor Opis Pengereja Pengawa Agus Buma, Direktor PERKESO Sarawak, John Riba Marin enggau komuniti Bidayuh ari 300 genturung pendiau di Pelilih Menua Serian sereta tuai-tuai pupu raban bansa ari sitak nya.