Anda di sini

Junaidi: Aku enda mantah, pemutus nya bepanggai ba ketuai dalam BN

Advertisement

Dikarang Chris Bishop //

KUCHING: Kaban Parlimen Santubong Datuk Wan Junaidi Tuanku Jaafar madahka diri enda mantah enti parti baru, Parti Tenaga Rakyat Sarawak (Teras) diterima masuk dalam serakup Barisan Nasional (BN) Nengeri.

Taja pia, iya madah, pemutus dilempaika ngagai raban ketuai renggat tinggi BN ngambika sekeda pekara ti tau mulaika pemaik ulih dikemujur.

“Ba atur demokrasi sereta nengah undang-undang, tiap iku orang ngembuan hak numbuhka parti.

“Aku ninga nengah surat kabar, Teras keran deka masuk dalam serakup BN tauka diterima nengah formula BN PLUS.

“Kitai semua nemu BN bisi ngembuan sebengkah konsep ti ngenukuka parti ti deka masuk BN patut nerima sukung ari raban ketuai parti bukai dalam serakup,” ku iya lebuh dikerandau pengudah ngulu “Program Sukaneka Mesra Rakyat 1Malaysia” di Bandar Baru Samariang ditu, kemari.

Wan Junaidi ke mega Sapit Menteri Dalam Menua madah pekara ke sama kala nyadi ba Parti Bansa Dayak Sarawak (PBDS) ba taun 1983 ke alai perintah nengeri maya nya bisi BN PLUS.

“Sistem tauka formula BN PLUS tu kala dikena kitai suba iya nya ba maya PBDS.

“Sarawak ngembuan peneleba ba pekara tu lalu pemutus dilempaika ngagai raban ketuai dalam BN ngemujur sekeda pekara ti tau mulaika pemaik,” ku iya.

Aku nadai deka mantah, tandu iya.

Iya nambah, enti diperatika enggau silik, Teras bisi 11 iku pengari rayat lalu tu ngarika seiti grup ti besai di Sarawak.

Taja pan jaku tuduh ti madah sida dipilih ketegal ngarika SPDP tauka SUPP lalu ukai dipilih ketegal deka masuk Teras, nya ukai pekara ke berat maya ke diatu.

“Diatu sida semua mengkang pengari rayat ke sah, sida mengkang ngarika rayat ba sitak diri empu lalu jaku tanya sekali sida diterima tauka enda ukai pekara berat.

“Pengawa bepilih ti deka datai deka nentu tauka nyaut semua tanya nya,” ku iya.

Sebelas iku pengari rayat dalam Teras iya nya Menteri Kanan enggau Menteri Pemansang Rama ke mega ADUN Pakan sereta MP Saratok  Tan Sri William Mawan, Menteri Opis Kunsil Kandang Menua enggau Menteri Pekara Wang II ke mega ADUN Bawang Assan Dato Sri Wong Soon Koh.

Ketuai bukai iya nya ADUN Tasik Biru ke mega Menteri Muda Pemansang Industri Datuk Peter Nansian, ADUN Marudi ke mega Menteri Muda Perengka Guna Mensia Mayuh enggau Menteri Muda Betanan Betupi Datuk Sylvester Entrie, ADUN Batu Danau Paulus Palu Ngumbang, ADUN Bekenu ke mega Menteri Muda Pengemun Pelajar Nembiak Rosey Yunus enggau MP Baram Anyi Ngau

Ari SUPP Adun Bengoh ke mega Menteri Muda Pengerai Mensia Mayuh Datuk Dr Jerip Susil, ADUN Engkelili Dr Johnical Rayong, ADUN Opar Ranum Mina. Bela nyereta Teras ADUN Pelagus,  George Lagong.

Teras disadang deka ngadu Aum Ninting Taun keterubah ba awak ke semak ngambika ulih numbuhka komiti baru sereta berandauka pengawa ngenuduk opis parti di Bandar Baru Batu Kawa (MJC).

Advertisement