SRI AMAN: Sekula mangku tanggungpengawa ke besai endur ngemujurka juluk ati menua kelimpah ari endur bala nembiak belajar ngambika ulih nempa mayuh agi rayat ke mujur sereta nyaup nyapai agenda pemansang menua Malaysia.
“ Taja pia, pekara tu patut bisi sukung enggau kerejasama ari semua kelebih agi ari bala pengajar, Serakup Apai Indai enggau Pengajar (PIBG) sereta mensia mayuh ba kandang menua nya empu,” pia ku Kaban Parlimen Sri Aman, Masir Kujat.
Ku iya, ba dunya ke diatu mayuh macham utai nyadi nyengkaum pemansang teknoloji pemadah enggau komunikasyen (ICT) ti ngujungka ‘Dunia Tanpa Sempadan’.
“Ngambi ulih ngasaika pemujur belama taja pan betapi enggau pemar di dunya tu, kitai patut nyendia sereta nyikap bala nembiak enggau mayuh macham pemandai, pengelandik nengkebang,talukka diri empu sereta manah ulah belama ngambika sida ulih napi ubah nya,” ku iya.
Iya bejaku munyi tu lebuh ti bejadika Aum Besai Serakup Apai Indai enggau Pengajar (PIBG) ke-17 sereta Aum Besai Serakup Alumni, Sekula Sekondari (SMK) Simanggang ba Dewan Rafflesia sekula nya ditu kemari.
Ku iya, batang agenda sesebuah sekula iya nya ngenegapka mayuh bengkah pemandai, landik bekomunikasyen kelebih agi ba Jaku Inggeris sereta ngiri mayuh bengkah pengelandik ngagai bala nembiak.
Taja pia ku iya, pandai aja enda chukup enti enda ngembuan ulah ke manah ti tau nyadika lalau sida. Pemanah ulah beguna amat sereta nyadika lalau kena napi gaya pengidup ke majak mar.
Ku Masir baru, pemansang mudal mensia mega patut diperambu enggau manah nyengkaum mungkur semua pekara. Semua pengelandik nembiak ulih dikemansangka nengah chara ke ngasi.
“ Kitai enggai nempa nembiak ke semina nyulut ba pelajar aja, tang nempa nembiak ke sebaka pemansang ari segi jasmani, emosi, rohani enggau intelektual, ngembuan disiplin diri ke tinggi, manah pemai diri, patriotik sereta enda ngemeratka diri empu lalu beguna ba mensia mayuh.
“ Pekara tu sebaka enggau dua ari enam batang strategik Indu Pelin Pemansang Pelajar iya nya nempa menua sereta ngemansangka mudal mensia. PIPP pelasar ke pemadu manah ti deka ngenegapka juluk ati perintah nyapai status menua maju nyerumba taun 2020,” pia ku iya.
Nengah pemanah kaul raban sekula enggau PIBG, sekula nya teperansang agi nyungkak pemanah ba akademik enggau kokurikulum nembiak sereta malutka apai indai enggau komuniti ba sekula. Kaul ke manah nya mega ulih nyungkak pemanah pekara belajar ti nguntungka bala nembiak ,” ku iya.
Bela bisi ngulu pengerami nya, Penulung Kanan Sekula, Engkamat Slapok, Direktor Program Latih Ke Bansa (PLKN) Zon Sarawak, Mohd Melintang Abdullah, Chairman Alumni, Francis Brayang, Ketuai PIBG, Jelaini Satin enggau bala pengajar kanan ke bukai.
Berebak enggau pengerami nya, Masir ngungkupka belanja RM 3,000 ngagai bala pengajar sekula nya ngambika bisi dikena meli jersi tim sekula lalu RM 5,000 Aagi diungkupka PIBG sekula nya.
Masir mega lalu diberi basa nyuaka perais ngagai 20 iku nembiak ke nyulut ba peresa perintah dalam taun 2013.