Dikarang Edwin Jemat //
Enti projek nya tau dikemansang jemah ila, minta nengah PKKAP ngambi bisi ke penguntung etnik
KUCHING: Ripot Empas Rampa Menua (EIA) berindik ari pengawa ngemendarka kuari penggi Gerempung Pemansang Ekonomi Sarawak (SEDC) ba taun 1996 di Tiang Bekap ngemeratka peranak menua di genturung pendiau (GP) nya.
Sapit Menteri Pengeraja Asal enggau Rampa Menua Dato’ Seri Dr James Dawos Mamit madah, ripot EIA pasal Kuari SEDC di Tiang Bekap nya dikemendar bepelasarka setindit antarabansa.
“Nyentuk ke diatu, kitai enda nemu sapa ngempu kuari nya, sekalika meruan SEDC tauka udah betukar pengempu?,” ku iya.
Berindik ari nya, iya meransang raban bansa Bidayuh ti diau ngelingi Bukit Tiang Bekap lebih agi etnik Pinyawa ngelansikka mata enggau pending ngerebut peluang enti sema kuari nya tau berengkah dipejalai jemah ila.
“Anang nangi, kitai tau besemekih enggau orang bukai ngena nama Serakup Pemansang enggau Main Asal Pinyawa (PKKAP) ngambika pemansang ba kuari nya tau nguntungka raban bansa Bidayuh lebih agi etnik Pinyawa,” ku iya.
Iya bejaku munyi tu maya atur pengawa Randau Merarau ba sebengkah restoren ditu kena tengahari Hari Enam tu tadi.
Lebuh nyaut tanya pasal pemingkuk ulah sekeda Ketuai Genturung Pendiau (KK), Dawos madah, PKKAP dibantu Komiti Pemansang enggau Pengelikun Genturung Pendiau (JKKK) patut suah agi ngatur randau begulai enggau KK sereta semua peranak genturung nya.
“Ari randau nya, kitai muntang agi nemu penanggul tauka sebana peranak menua, anang nganti ‘Asi nyadi bubur’, perunding, tapi sereta putar jampat enggaika ulah tauka penemu bingkuk ti dikembuan KK nya ‘Nyadi Ensiban Nguyum Dalam Isi’,” tandu iya seraya ngelalau semua komiti PKKAP chakah agi gawa ke pengelantang entik nya empu.
Ngenang pengawa nyukat perimeter tanah Adat Bansa Asal (NCR), iya madah, bansa Bidayuh nengah Serakup Bansa Dayak Bidayuh (DBNA) nyadi penyanding penemu pasal pekara nya patut nemu ngeluruska semua penanggul tauka penyarut, dibantu KK sereta pengempu tanah ti bekunsika entara.
“Semua KK ti nguasa GP Bidayuh Pinyawa patut ngembuan penemu tengahari sereta enda bechiping lebuh ngatur entara orang ti ngempu tanah, pia mega enti sema bisi ulah pemaju tanah salah ngereja tauka ngelui entara masuk tanah orang,” lalau iya.
Berebak enggau nya, iya madah, enti bisi penyarut ti mar diputar entara pengempu tanah NCR ba sesebengkah GP, betemu enggau luyar PKKAP.
“Ba pekara undang-undang, PKKAP tau betanya ari luyar ti dipilih serakup,” ku iya seraya nyebut nama seiku luyar ti mayuh peneleba, Datuk Detta Samen ke mega presiden Suhakam.
Bela bisi ngulu atur pengawa nya, sekretari Kaunsil Kandang Bandar Padawan (MPP) Michael Sawing, presiden PKKAP, Douglas Jipau, sekeda kaunsilor MPP, ketuai raban bansa sereta KK ari 12 GP Bidayuh Pinyawa sereta kaban komiti PKKAP bukai.