Anda di sini

Sebuyau majak mansang sereta dikelala mensia mayuh, ku Julaihi

Advertisement

SEBUYAU: Peranak Sebuyau diatu ulih ngasaika mayuh penguntung ari pemansang asil perambu strategik perintah Barisan Nasional (BN).

Menteri Muda Pemansang Muda Menua Pesisir Datuk Julaihi Narawi madah,diatu peranak menua nya ulih pulai mansang ke pelilih mit menua tu bejalaika pengawa ngemansangka ekonomi.

Nya alai ku iya ti nyadi Kaban Kunsil Nengeri (ADUN) Sebuyau ngarapka peranak menua tu ulih ngena enggau manah sereta sama nyukung pemansang ti dipejalaika.

“Suba nadai mayuh orang datai ke Sebuyau tang seharitu asil ari pemansang ke dibai perintah ulih matak pemayuh orang luar datai kitu bejalaika pengawa dagang sereta ngelantangka ati,” ku iya.

Iya bejaku munyi tu ba Pengerami Sebuyau ti dipenyadi Kepala Menteri Tan Sri Adenan Satem di Tebing Sungai Sebuyau ditu kemari.

Bela bisi datai ngulu pengerami nya Kaban Parlimen Kota Samarahan Rubiah Wang, ADUN Sadong Jaya Aidel Lariwoo, ADUN Saribas Razi Sitam, ADUN Beting Maro Razaili Ghapor enggau ke bukai.

Entara pemansang ti amat beguna dibai ngagai kandang menua Sebuyau iya nya sistem penyambung enggau perengkaguna mensia mayuh.

“Diatu mayuh perengkaguna disedia baka feri ti ngemuntangka peranak di menua tu mindah kin kitu.

“Enti jematan Sungai Buluh (Jematan Batang Sadong) enggau jematan Batang Lupar tembu ila, pengawa ekonomi di menua tu deka lebih mansang agi,” ku iya.

Ngenang Pesta Sebuyau, Julaihi madahka penyereta semua raban bansa ti enda ngira bansa enggau jalai pengarap ngayanka pemaik enggau pemanah kaul rayat nengeri tu.

“Tu meh ti deka dipeda kitai, semua raban bansa enda ngira tikas umur, sama begempuru ngemujurka atur pengawa ti endang diungkupka rayat,” ku iya.

Entara atur pengawa ti bisi dipejalaika bserimbai enggau Pengerami Sebuyau iya nya Regatta Sebuyau, pekit karaoke, bemukun, gerai bejual pemakai enggau ke bukai.