Dikarang Chris Bishop //
Nengah pengelandik nya sida ulih nyaup perintah ngemujurka perambu pemansang ungkup rayat
SIBURAN: Bala Ketuai raban bansa (KK) patut ngembuan mayuh macham pengelandik ngambika tusun program enggau pemansang ke diperambu perintah ulih dikemujur.
Kaban Kunsil Dewan Undangan Nengeri (ADUN) Tarat Datuk Roland Sagah madah, pekara nya chukup beguna laban KK nyadi penyambung entara rayat enggau perintah lalu semua pengelandik nyadi tuai pupu bansa sigi diguna.
“Kerejasama manah entara KK, rayat enggau perintah chukup beguna. Raban KK patut nusun program pemansang ba genturung pendiau diri, lalu semua pemansang nya sigi ungkup rayat.
“Kena nentuka genturung pendiau mansang, KK patut ngembuan pengelandik macha, nulis, nemu ngena komputer sereta nemu meri jaku ajar enggau peransang ngagai rayat”.
“Semina nengah semua pengelandik nya, pejalai program pemansang ke diperambu ulih dikemujur, ke alai KK nyadi sebagi ari ijinsi perintah,” ku iya.
Sagah mansutka jaku tu ba pengawa nyerahka setipikit chiri Ketuai raban bansa/komuniti ungkup sitak DUN Tarat enggau Bengoh di seiti restoren ditu, pagi kemari.
Iya ke mega Sapit Speaker DUN mega ngelalau raban KK patut nemu pinta enggau peneka rayat, kelebih agi enti genturung pendiau ke dikuasa iya ngembuan lebih ari seiti jalai pengarap.
Ku iya, pekara nya chukup berat ketegal pinta enggau peneka rayat ari tiap batang pengarap enda sebaka.
Dulu agi ari nya, Pemangku Residen Kuching Zamahari Saidin ba jaku pengelalu iya ngansak raban KK ke nerima setipikit chiri nyendia peminta geran projek ungkup genturung pendiau lalu disua sebedau bulan Oktober 2014.
“Aku minta KK beratika genturung pendiau diri lalu nyendiaka peminta geran projek nyengkaum projek ngaga tauka ngemanah balai mensia mayuh, jalai alun tauka projek bukai.
“Semua nya patut dianjung sebedau bulan Oktober tu, ke alai raban pemesai ari ejensi perintah deka nemuai ngemata tiap buah genturung pendiau sebedau pinta sida (KK) dikenataika ngagai pengari rayat,” ku iya.
Pekara tu ngemudahka perintah enggau YB nentuka bagi projek ke patut digaga dulu, tandu iya.
Seiku Pemancha, Raymond Jihap sereta dua iku Pengulu, Ranit Ak Rujah enggau Norbert Nuom Ak Layon udah nerima setipikit chiri kemari.
Kelimpah ari nya, 54 iku KK ari DUN Tarat enggau Bengoh sama bela nerima setipikit ke sama.
Bela bisi datai ba pengerami nya, ADUN Bengoh ke mega Menteri Muda Pengerai Mensia Mayuh, Datuk Dr Jerip Susil enggau Temenggung Bidayuh Pelilih Kuching, Austin Dimin.