Anda di sini

Penerang dipansutka Manyin ngelantangka ati Alexander

Advertisement

KAPIT: Sapit Menteri Pemansang Menua Pesisir enggau Kandang Menua, Datuk Alexander Nanta Linggi berasai lantang ati ninga penerang ari Menteri Pemansang Infrastruktur enggau Penyambung Sarawak, Dato Sri Michael Manyin ti dipansut ba surat kabar The Borneo Post empai lama ke udah begulai enggau Chairman Kaunsil Sungai-Sungai Sarawak (LSS), Dr Murni Suhaili sereta Kontroler LSS, William Jinep.

Lebuh bejaku ba aum media di Kuching, Manyin madah “LSS deka nambahka penyampau bot ekpress ke suah pulai mansang nengah Batang Rajang ngambika ulih napi penyampau penumpang ke mayuh ari Sibu ke Kapit maya pengerami Hari Gawai tu ila”.

Manyin mega madah, penanggul ke ditapi diatu iya nya kurang penyampau bot ekpress ke pulai mansang ti betengahka jalai ai nya. Enti nitihka penerang ti disediaka LSS, penyampau penumpang ti bekenaka terminal ekpress ari Sibu ke Kapit dipelabaka urung 5000 iku sehari, tang semina 54 buah bot ekpres ti ngundan 1000 iku penumpang sehari.

Alexander gaga ati ninga penerang ari Manyin ti deka nambahka penyampau servis bot ekpress entara Kapit enggau Sibu nyerumba pengerami Hari Gawai tu ila.

“Aku mega arapka sida ngemendarka permit ngagai bot ekpress ke baru bejalaika operasyen entara Kapit ke Sibu tauka ari Song ke Sibu. Aku nemu bisi peminta permit ari sebuah kompeni di Pasar Song ti bedau dikemendarka. Aku arapka peminta kompeni nya diperundingka, laban naka ke diatu semina sebuah bot ekpress aja ke ngangkut penumpang ari Song ke Sibu ti diempu peranak menua nya. Naka ke diatu, nya meh peminta kedua ti udah dianjung ngagai LSS ke bedau ditemu pemutus. Arapka LSS ngemendarka peminta nya ngambika pulaika pemaik ngagai rayat ari Pelilih Mit Song”, pia ku iya.

“LSS patut semampai nemu utai ke diguna orang ti ngemeranka dagang bot ekpress di Kapit, Song ke Sibu, Kapit ke Belaga sereta ari Kapit ke Baleh”, pia ku iya.

Lebuh ke ngenang sentang perengkaguna ba terminal ekpress Kapit, Alexander madahka perengkaguna ba terminal nya patut dikemanahka agi ngambi pulaika pengelantang enggau pengelikun penumpang enggau orang ti ngemeranka dagang bot ekpress nya dia.

Iya mega berasai asa ati lebuh ke meda 11 buah bot ekpress ke ditanchang bererintai ba terminal Kapit, ke alai pekara nya udu ngenataika penusah di terminal nya.

“Aku berasai asa ati meda pekara nya berindik ari pemutus ti semina deka ngena sebuah aja terminal ti ngujungka terminal nya udu sekut. Nya mandangka orang nya enda nemu gaya ke nyadi ba terminal nya,” pia ku iya.

Sebedau tu, Alexander bisi di Kapit ngulu sekeda pengerami Mantar Gawai ke diatur ba Song enggau Kapit sereta mega nemuai ngagai sekeda rumah panjai dalam sitak Parlimen Kapit. Penemuai iya disempulang Sekretari Politik Kepala Menteri Sarawak, Jefferson Jamit, bala ketuai opis perintah enggau ketuai raban bansa.

Advertisement