Anda di sini

Penemu raban etnik pasal guna utai tumbuh dalam kampung dirikod

Advertisement

KUCHING: Penemu 16 iku ari raban etnik di nengeri pasal guna utai tumbuh  dalam kampung ke ulih dikena dalam bidang berubat, pemakai, enggau guna bukai udah dirikod dalam dokumen ngambi tau nyadika lalau jemah ila.

Sekretari Perintah Nengeri ti mega Chairman Kaunsil Biodiversiti Sarawak, Tan Sri Datuk Amar Mohamad Morshidi Abdul Ghani madah, nya dikena nyeliahka penemu asal orang tuai bekaul enggau guna utai tumbuh nya ngambika enda punas sereta dikemansangka.

“Seraban 16 iku ari menua pesisir udah enggau ba seminar,bekunsi penemu sida sentang guna utai tumbuh dalam kampung enggau kami (SBC), lalu kami ngerikod dalam dokumen kena nyaga sereta ngintu penemu sida.

“Ngelama tu sida ngembuan mayuh penemu pasal guna utai tumbuh nya ti tau digaga ke ubat, pemakai enggau sekeda utai bukai,” ku iya.

Morshidi mansutka pekara tu lebuh dikerandau pengarang berita pengudah bejadika TK Headhouse & Propagation enggau Hari SBC ti diatur ba SBC di Jalai Puncak Borneo ditu, kemari.

Bejaku baru iya arap endar penemu, guna enggau asil pansik pasal utai tanam asal nengeri tu ulih dijaga sereta diintu nengah Undang-undang Biodiversiti.

“Kitai bisi Undang-undang Biodiversiti Sarawak  dikena ngelindung asil rampa menua kitai. Enti nadai (undang-undang nya), sesapa aja ari serata dunya ulih datai enchuri lalu mansutka asil baru,” ku iya.

Kelimpah ari nya, pemangku Ketuai Pemesai Eksekutif SBC, Dr. Yeo Tiong Chia dalam jaku pengelalu iya madahka pemesai ari Opis Kampung Sarawak mega sama bela bisi enggau ba seminar nya.

Ku iya, seminar ke diatur sereta digulu 16 iku raban bansa etnik ari nengeri tu, mega berandauka pasal pemansang dokumentasi enggau guna utai tumbuh dalam kampung.

“Nengah seminar tu sida bekunsi peneleba enggau pangan diri seraya madahka nama utai tanam ti pemadu beguna dalam raban bansa sida empu.

“Asil pekara ke dipekunsika nya beguna  amat laban ulih nulung kami ngatur pengawa pemansik,” ku iya seraya meri terima kasih ngagai ba penyereta.

Advertisement