Dikarang Chris Bishop //
Kepala Menteri mega kala nerima PBDS nyadi kaban BN dalam taun 1983
SIBURAN: Semilan iku ADUN ari SPDP enggau SUPP ke tama Parti Tenaga Rakyat Sarawak (TERAS) enda ngeruga penyerakup enggau penegap Barisan Nasional (BN) Nengeri, ku Dr Jerip Susil.
Iya ti enda lantang ati enggau jaku tuduh sekeda orang ti madahka sida ukai dalam BN, minta badu betalatka pekara nya agi.
“Badu ngemesaika pekara tu, kami ngemerat penegap BN Nengeri taja pan lima iku ADUN ari SPDP enggau empat iku ADUN SUPP udah begempung ari baruh seiti payung.
“Kami seraban udah betemu enggau Kepala Menteri lalu besemaya kami mengkang gawa, meri servis ngagai rayat nengah BN.
“Anang salah runding, sekeda mantah parti baru tu masuk BN kelebih agi raban ketuai ari SPDP enggau SUPP,” ku iya.
Jerip mansutka penerang tu ba pengerami nyuaka setipikit chiri ngagai 57 iku Ketuai raban bansa ungkup ADUN Bengoh enggau Tarat di sebuah restoren ditu, pagi kemari.
Iya ke mega Menteri Muda Pengerai Mensia Mayuh madah, pekara ke sebaka kala nyadi dalam taun 1983, ke alai Kepala Menteri maya nya udah netap pemutus nerima Parti Bansa Dayak Sarawak (PBDS) nyadi kaban BN tauka dikumbai ‘BN PLUS’.
“Nerima PBDS nyadi ‘BN PLUS’ mujur ngenegap politik di Sarawak maya nya, lalu pekara ke sama mega ti nyadi diatu.
“Kami ngasai payung baru tu ulih nyaup mulaika penegap ngagai BN sereta gaya politik dalam nengeri tu,” pia ku iya.
Bisi sekeda ketuai sereta raban enda ngalih, SPDP pan sama BN lalu SUPP pan sama BN mega, tandu iya.
Iya netapka sida seraban dalam Teras nadai ngembuan niat deka belaya enggau ketuai ari SPDP enggau SUPP lalu keran majakka pengawa meri servis ngagai rayat nengah chara ke lantang.