Anda di sini

‘Single Window, Multiple Channels’ portal perintah nengeri Sarawak teulihka 5 bintang

Advertisement

KUCHING: Pengereja pengawa opis perintah di menua tu patut  mantu sereta meri servis ti manah ngagai rayat taja pan penanggul ti dikenataika ukai bekaul enggau opis tauka ejensi lalu nya nyadi sebengkah  tanggungpengawa ke patut dipejalai.

Sekretari Perintah Nengeri Tan Sri Datuk Amar Mohamad Morshidi Abdul Ghani madah, nya ngambika senipak enggau konsep ‘One Government at Your Services’ ti dikemeranka perintah.

Nitihku iya, juluk konsep nya (One Government at Your Services) iya nya ‘Single Window, Multiple Channels’.

“Konsep tu ke bendar iya ukai semina dikemeran maya meri servis ba kaunter tang ‘One Government at Your Services’ mega diguna tiap kali penanggul diasai, dipeda tauka ti dipadahka rayat ngagai kita, lalu kita ti ngempu penanggul nya.

“Penanggul ti diasai, dipeda enggau dipadahka rayat nya engka ukai penanggul opis menteri tauka ejensi tauka opis pelilih menua kita, tang kita ti gawa enggau perintah ulih nulung rayat mutarka penanggul baka mai pekara nya ngagai ejensi tauka opis ti bekaul,” ku iya.

Morshidi mansutka pekara nya lebuh bejaku ba Majlis Anugerah 5 Bintang / Laman Web Agensi Kerajaan Negeri & Pelancaran Portal Rasmi Pentadbiran Bahagian Miri enggau Sarikei ba sebengkah hotel ditu, malam ensanus.

Ngenang penyulut portal enggau websait opis perintah iya madah, State Electronic Government Official Portal iya nya url.www.sarawak.gov.my ti udah beturut teulihka 5 bintang ari taun 2007 ngagai diatu kelimpah ari taun 2010.

Iya madah, penyampau ejensi perintah Sarawak ti teulihka 5 bintang ‘Malaysia Government Portals and Website Assessment’ (MGPWA) ba taun 2013 bisi nambah dibandingka taun 2012.

Tuju MGPWA dipejalaika dikena ngamanahka agi sistem servis ejensi perintah nengah portal tauka websait. Pengawa ngenukuka bagi ejensi perintah ti patut diberi 5 bintang iya nya Multimedia Development Corporation (MDeC).

“Bisi 34 portal enggau websait ejensi perintah Sarawak diberi gelar 5 bintang ti nyengkaum Sarawak Governmenat Official Portal (www.sarawak.gov.my) ba taun 2013 dibandingka semina 7 aja ba taun 2012. Tu ngayanka 400 peratus niki.

“Tiga puluh empat nya nyengkaum sebengkah opis menteri, semilan opis, dua opis residen, semilan opis pelilih mit menua, lima opis penerit adat enggau tujuh gerempung statutory.

“Kitai ngarapka ejensi perintah kitai ti udah teulihka lima bintang nya deka terus ngetanka tikas nya lalu ejensi ke bukai ti teulihka empat enggau tiga bintang enggau ke nadai menang patut bebendar agi ngulihka lima bintang,” ku iya.

Ngenang Portal Rasmi Pentadbiran Bahagian Miri dan Sarikei ti baru dipenyadi, Morshidi madahka  opis residen enggau opis pelilih mit menua kededua bagi menua udah dipilih Unit ICT nyadi pengepun projek dikena nyerakupka websait (kededua) nyadi seiti.

“Tuju tu ngambika ‘win-win’ ke alai ulih meri penyenang ngagai orang mayuh ti ngiga penerang nengah portal tauka websait ti disediaka perintah,” ku iya.

Bisi datai ba pengerami nya, Sapit Sekretari Perintah Nengeri Datu Misnu Taha, Diretor Unit ICT William Patrick Nyigor enggau ke bukai.