Anda di sini

Badu bekelikuh, madahka ngerebut penuduk

Advertisement

BAU: Pengari ari Parti Tenaga Rakyat Sarawak (TERAS), Datuk Peter Nansian Ngusie (gambar) minta semua ketuai parti dalam gempung Barisan Nasional (BN) badu bekelikuh ti madah, ngerebut penuduk kunsil nengeri tauka parlimen.

Bejaku ba sebengkah aum pengarang berita di Opis Pelilih Mit Bau kemari, Nansian ke ningkilka diri ari Parti Demokratik Progresif Sarawak  (SPDP) lalu nyereta TERAS madah pekara nya patut enda malut runding sida.

Ku Nansian ke mega Kaban Kunsil Nengeri (ADUN) Tasik Biru, kaban dalam parti serakup BN patut meretika sistem Barisan ke alai semua penuduk sigi diempu BN lalu ukai diempu seiku orang tauka sebengkah parti.

“Semua penuduk enggi BN magang lalu BN ke nyadi parti besai ngembuan hak ngagihka penuduk ngagai pengari tauka parti ti dikearap ulih ngintu penuduk nya enggau manah.

“Pekara nya nyemaka seiti pen ke diempu aku, ke alai aku ngembuan kuasa meri pen nya ngagai seiku entara kitai ngambika diintu enggau manah. Enti aku nemu nuan deka ngelenyauka pen nya, nadai kebuah aku meri pen ngagai nuan,” ku Nansian.

“Anang mikir kami deka nyadi panjuk ngagai parti bukai. Enda ibuh bekelikuh senentang penuduk ketegal semua nya diempu BN lalu nadai kebuah kitai belaya ketegal nya,” ku iya nambah.

Ngenang runding sekeda orang ti mikir pemutus Nansian sereta semilan pengari rayat bukai ari SPDP enggau Parti Sa’ati Rayat Sarawak (SUPP) ti ningkilka diri ari parti lalu nyereta Teras ukai BN, Nansian enda setuju enggau penemu tauka runding nya.

Komen aku bepelasarka ulah lalu ukai nitihka leka jaku, nuan ulih meda kami mengkang meri servis nyadi pengari rayat BN lalu pia mega meri servis nyadi menteri ba perintah BN.

Nitihka atur, kami mengkang pengari rayat sereta menteri di baruh BN lalu kami enda kala ninggalka BN.

“Sida patut gaga ketegal kami nadai agi ba dalam parti lalu udah ngemantup semua pinta enggau peneka sida. Nuan dekaka parti, kami meri nuan parti,’ ku iya.

Ditanya senentang pangku pengawa dalam Teras, Nansian madah pekara nya udah dipejurai entara sida lalu semina deka dibantai ba maya ke ngena.

Berindik enggau nya, Parti TERAS disadang deka ngadu Aum Ninting Taun keterubah ba awak ke semak iya nya dipelaba ba minggu tu ngambika ulih numbuhka komiti baru sereta berandauka pengawa ngenuduk opis parti di Bandar Baru Batu Kawa (MJC).