KUCHING: Projek Jalai Kapit-Kanowit ti beungkus RM700 million deka berengkah dipejalaika pengudah nerima surat tinda ari Opis Menteri Pekara Wang, ku Menteri Pemansang Infrastruktur enggau Penyambung Dato Sri Michael Manyin Jawong.
Iya madahka ke diatu opis menteri benung nganti surat tinda projek nya.
“Projek Jalai Kapit – Kanowit ti ditambah enggau jematan ditagaka beungkus RM700 juta dipelabaka tembu dalam taun 2017 ila, lalu deka berengkah dipejalaika enti udah nerima surat tinda ti diputuska Opis Menteri Wang,” ku iya.
Manyin mansutka pekara nya lebuh dipinta ngenang pejalai projek Kapit-Kanowit, pengudah tembu sebengkah aum pengarang berita ditu kemari.
Projek Jalai Kapit – Kanowit sebengkah projek dipejalaika ari baruh National Key Results Area (NKRA), ti penyauh 101.2 kilometer (KM).
Nambahka nya iya madah pengawa ngemanahka servis perengka pengakut bas mensia mayuh di mengeri Kuching dalam perambu.
Perintah besai deka nyendiaka belanja nengah Projek Peningkatan Bas Komuter (CBIP) ti diperambuka penyauh ditambahka ari 269 kilometer ngagai 516 kilometer, ti bisi 14 pejalai jauhg enggau 12 bas pengantara.
Lebuh ti nyimpul jurai opis menteri maya aum Kunsil Nengeri apin lama iya bisi madahka penyuah servis bas mega diperambuka ditambah ari 15 minit ngagai 30 minit ngagai pejalai ti kena sekut sereta 30 minit ngagai 1 jam ke pejalai ti enda tentu sekut.
“Mengeri Kuching udah dikelala nyadi sebuah ari tujuh buah mengeri di Malaysia dibaruh Suruhanjaya Pengankutan Awam Darat ti diperambu nyendiaka servis perengka pengangkut bas ti manah ngagai orang mayuh.
“Nyema ke pekara tu mujur diperambu sereta diperunding, opreasyen tu deka berengkah dipejalaika bulan September 2014,” ku iya.
Berindik ari pekara nya, iya madahka palan pengetu bas mega diperambu deka dikemayuhka tauka ditambahka agi.