Anda di sini

Peranak Rumah Ngumbang mantai penyinu diri

Advertisement

SARAT MUAT BARANG: Perau panjai ti dikena Wan (luan) sarat ngangkut barang dikena nyaup peranak Rh Ngumbang ke tasah angus empai lama ke udah.

Berindik ari penusah angus nya, sida serumah ngarapka perintah mantu ngaga rumah panjai baru enggau jampat

KUCHING: Peranak Rumah (Rh) Ngumbang di Lubok Antu berasai sinu ngenang nasit diri ke enda ulih nyambut Gawai Dayak enda lama agi, berindik ari rumah panjai sida ke angus kena 13 Mei tu tadi.

Penusah angus nya ngujungka seiku indu OKU parai nyengkaum padi ke disimpan setaun sama retung magang-magang.

Kaunsilor James Inggang madah, semua sida bukai ke diau di rumah panjai nya mungkur 36 ruang bilik nadai endur diau lalu numpang ba rumah orang bukai.

“Berindik ari penusah nya, semua sida serumah ngarapka perintah ulih mantu ngaga rumah panjai baru sida enggau jampat.

“Penusah ti nuntung kami sekali tu pemadu berat, ukai semina retung reta tengkira, seiku ari kami serumah parai ba penusah nya lalu baka nya mega, taun tu kami enda ulih nyambut Hari Gawai baka ke udah diperambuka sebedau tu,” ku iya.

James mega minta orang mayuh, gerempung ukai dikuasa perintah (NGO) datai mantu ngambika ulih ngelempungka agi penusah ke ditapi sida.

“Kami nadai utai tinggal, semua gari, perengka guna dapur sereta pemakai abis retung. Kami ngarap endar mensia mayuh ke betatika penusah tu datai mantu kami,” ku iya.

Genturung pendiau nya ku James, bepanggai ba pewrengka pengangkut sungai enti sida iya deka nurun ke pasar ke semak enggu penyauh merau kandang dua jam.

“Kelimpah ari nya, kami semina bepanggai ba ai sungai aja nyadi ai irup sereta rumah panjai kami ke nadai karan,” ku iya.

Rumah panjai ke angus 13 Mei urung pukul 9.00 pagi ngujungka sekeda sida ke diau di rumah panjai nya bakal, lalu entara nya dua iku orang tuai, Sendie Munchat, 75, enggau Meriam Ngipa, 68 taun.

Penengkebang Gerempung Pengelantang Pendiau Hope Kuching, Kelvin Wan maya bekunsika peneleba iya madah, dua iku orang tuai nya bakal maya rumah panjai nya angus.

“Sida iya madahka diri pedis ngagai aku, lalu datai ke seharitu, aku berasai sinu ati ngenang nasit sida iya.

“Indai tuai ke benama Sendir nya pan berapa hari tu ke udah, enda masuk makai lalu semina ngirup ai mineral aja laban balat pedis,” ku iya.

Advertisement