Dikarang Rengenyan Labang
KUCHING: Operasyen Penerit Adat nyerumba pengerami Gawai Dayak 2014 deka chakah dipejalaika ba Terminal Penumpang Kuching, Sibu, Kapit, Sarikei enggau Marudi, kena nentuka pengelikun penumpang perengka pengangkut ai.
Menteri Pemansang Infrastruktur enggau Penyambung, Dato Seri Micheal Manyin Jawong madah, operasyen nya dipejalaika Kaunsil Sungai Sarawak (LSS) enggau kerejasama Opis Tasik Kandang Menua Sarawak (JLWS), Ejensi Penerit Adat Maritim Malaysia (APMM) enggau Polis Diraja Malaysia (PDRM).
Iya madah, di nengeri tu ninting taun endang betapi enggau pemar baka penyampau bot ekspres enda tetangkupka pemayuh mensia ti pulai ke menua maya pengerami Gawai Dayak ti berebak enggau kemisi sekula.
“Operasyen Penerit Adat nyerumba Gawai Dayak deka chakah dipejalaika, ukai semina ba Terminal Penumpang Sibu enggau Kapit ke alai mayuh bansa Iban betatam tang nyengkaum terminal bukai (Kuching, Sarikei enggau Marudi) laban bansa bukai pan ngambi peluang kemisi lalu pulai ke menua maya pengerami tu.
“Ambika banding tiap pengerami Gawai Dayak urung 5,000 iku penumpang ngena bot ekspres ari Sibu lalu pia mega di Sibu (urung 5,000 iku orang tambang). Nya meh pemar ditapi kitai laban pemayuh bot enda tetangkupka pemayuh mensia.
“Ngarapka semua orang tambang sereta pengemeran bot meri kerejasama ngagai LSS ti bejalaika pengawa, lalu orang tambang dilalau enda ngena bot ti udah sekut tauka penuh, ke pengelikun diri empu,” ku iya.
Manyin mansutka pekara nya dalam aum pengarang berita ba sebengkah hotel ditu kemari.
Kelimpah ari nya dalam aum pengarang berita ti sama, Controller LSS, William Jinep madah, LSS mega deka ngatur ‘River Block’ enggau ‘River Patrol’ ba endur ti patut di Batang Rajang, nyengkaum Pelagus, Belaga & Batang Balleh, Batang Igan, Batang Kemena enggau sungai besai di serata sarawak.
“Tuju operasyen ‘River Block’ dikena ngenukuka tiap bot enda mai orang tambang ngelui ari penyampau ke udah ditetapka. ‘HAD PENUMPANG’ ba tiap bot dipandangka ba tisi kededua piak bot.
Nambahka nya, iya madah, dikena nyeliahka penusah tauka pekara ti enda disadang nyadi sereta bot mai penumpang ngelui ari ke patut, LSS meri kelala ‘Pas Pelepasan’.
LSS udah meri kelala polisi ‘No Ticket, No Entry’ di terminal besai di serata Sarawak berengkah 1 Mei tu tadi sereta nerima timbal ti manah ari mensia mayuh.
“Chara kitai nyeliahka bot mai orang tambang ti ngelui sekat, kami ngemeranka Polisi ‘No Ticket, No Entry’ laban enti nadai tiket nuan enda ulih masuk. Tu mega dikena nyeliahka tiket dijual ngena rega ti mar,” ku iya.
Nitihku William, dikena nangkup peminta guna pemayuh penumpang maya musim pengerami, LSS deka ngambi bot ke kurang orang tambang ari sekeda endur, lalu dikena nambahka bot ba endur ti mayuh peminta guna.
Sama bisi ngulu aum pengarang berita nya kemari, Chairman LSS Murni Suhaili.