Anda di sini

Main asal enggau chura pengidup bansa Iban majak kusi nyerunyut ubah pemansang

Advertisement

PATUT DITAN: Gambar fail tu mandangka sebengkah main asal Iban, gendang pampat ke bisi diatur beserimbai enggau Pengawa bejadika Simposium Adat Iban 2013 di Sibu taun nyin suba.

Dikarang Judan Bungap

 

SIBU: Main asal enggau pengarap, kelai raban bansa Iban pegari sereta dikelala raban bansa bukai di serata dunya nyengkaum bansa ribai ti rindu begagaka pansik sereta belajarka chara pengidup bansa Iban ari kelia nyentuk ke sehari tu.

Tebal agi ba pansik sida muji penyelai enggau pemanah tusun leka jaku Iban ti serurun baka ba leka main bepun ari ke tekait ati meda penyelai adat enggau chara idup bansa Iban kelia menya.

Tang taja pan baka nya, dalam kandang 30 ngagai 50 taun ti deka datai tauka tumu agi ari nya, pengaya enggau penyelai adat enggau main asal tu ti ngasuh bansa Iban jarang enda dikelala tau punas pia aja lalu semina nyadika kenang dudi hari.

Tu nyengkaum pengawa nyadi lemambang ke majak jarang dipeda ketegal ketuai ti megai pengawa besai tu mayuh udah midang.

Pekara tu bela diasai Lemambang Duli Sanggau, 62, ari Rumah Manja, Sungai Naman, Sibu.

Maya dikerandau pengarang berita empai lama tu tadi, iya madah, sida ke tuai ke bukai ti megai pengawa baka lemambang balat nangi main asal bansa Iban majak enda dikembuan tauka dikemerat.

Ku iya, pekara baka tu nyadi bepun ari ubah gaya pengidup enggau chura runding rebak baru ke udah nyingkang nyerumba tikas pemansang dunya.

“Enda lama agi semua adat enggau main asal bansa kitai Iban semina dikenang aja laban rebak barunadai ati deka belajar enggau bebendar lebih agi baka ngangkatka pengawa nyadi lemambang.

“Kitai enda mejal tauka ngengggai laban ubah dunya diatu enda baka dulu suba ti ngemeratka pengarap asal nyadika malin pengidup besesehari,” pia ku iya madah.

Lemambang Duli madah, iya baru lima tauka enam taun udah nyadi lemambang laban ke endang deka ngerengkunka pengawa asal nya nyadika kelai bansa Iban kelimpah naka alah ngentan ari ke punas.

Iya didirika Lemambang Gindi Gaing nyadi lemambang tang lebih 15 taun nyadi penyagu.

Kelimpah ari landik ba pengawa asal Iban, Lemambang Duli mega suah dikangau betuaika gawai baka Gawai Tuah, Timang Bulu, Timang Kelingkang, Ngua Orang Sakit, Gawai Panggul tauka mayuh gawai ke bukai nyengkaum kala dikangau nimang maya bisi pengerami Gawai Dayak renggat pelilih Sibu.

Pengelandik iya baik nya bebiau tauka nimang enggau main asal bukai kala dipeda lebuh iya suah megai gelar champian ba pekit main asal maya Pengerami Mantaika Main Asal Dayak (BDCF) di Sibu, bepekit ba Radio Televisyen Malaysia (RTM), maya pengerami ke diatur Tun Jugah Foundation (TJF) enggau mayuh pekit ke bukai.

Nampung jaku iya baru, Lemambang Duli mega meri jaku tangkan ngagai rebak baru diatu ngambika enda sanggu belajar tauka betanya ngagai sida ke tuai senentang main tauka pengarap asal bansa diri.

Iya pechaya nadai lemambang tauka sida ke tuai enggai bekunsi penemu enggau rebak baru keba ku iya sida deka berasai temegah ati enti bisi nembiak diatu rindu belajarka pengarap enggau main asal bansa diri empu.

“Belajar tu enda tusah enti kitai amat-amat deka bebendar.

“Tang kitai berasai sinu amat nadai mayuh rebak diatu deka belajar,” ku iya madah baru.

Kelimpah ari nya Lemambang Duli madah, iya berasai temegah ati laban diatu udah mayuh gerempung tauka serakup enggi bansa Iban belabuh ngemeratka pengarap enggau main asal ba batang tuju pejalai gerempung sida.

Pekara tu ku iya tau dipeda maya sesebengkah pengerami ke diatur gerempung tauka serakup bansa Iban jarang enda mantaika main asal.

“Tu pengawa ti manah. Taja majak nadai orang deka nandu pengawa baka nyadi lemambang tauka pengawa ke bukai tang ari pengerami ke diatur nembiak rebak baru ulih dipandang enggau main tauka pengarap asal bansa Iban.

“Kitai pechaya gerempung tauka sarakup ulih bejalaika mayuh bengkah chara dikena mantai lalu mai nembiak rebak baru belajar sereta meretika adat bansa kitai.

“Taja pan baka nya, sida bekenaka turu enggau belanja, nya alai, besai amat pengarap baka kami ke tuai, perintah ulih mubuhka mayuh agi bantu ngagai sida dikena megai tanggungpengawa tu,” ku iya madahka baru.

Ba taun 2008 suba, Lemambang Duli bisi nirika mahligai ungkup anak indu iya ke lama udah enda dikereja raban bansa Iban kenyau ari kelia.

Pengawa iya tu ukai dikereja nundaka peneka ati aja tang endang dibai mimpi ke ngasuh iya nirika mahligai ungkup anak umbung iya ke benama Lolita.

Ku iya, kenyau mahligai tu didiri mayuh bengkah pekara nyelai ke nyadi nyentukka bisi diambi mimpi tauka datai nyengenda, nyeruga.

Ba pemendar iya deka ngetanka main enggau adat asal Iban, Lemambang Duli mega enda sayau bedua ke penemu bepun ari iya diatu udah mujur ngaga album ke benama Bepantun Iban ari baruh Andrewson Ngalai Production (ANP) di Miri.

Album nya udah tembu digaga lalu deka belabuh dijual bulan tu mega.

Album tu ngundan enam iti bengkah pantun baka Pantun Puji, Pantun Sayauka Orang Indu, Pantu Enda Ampit, Pantun Meri Ubat, Pantun Ngading Nembiak Baru Ada enggau Pantun Meri Ngirup.

Tuju ngaga album tu ku iya endang deka bekunsika penemu ngagai nembiak baru ngambika semampai ulih dikenang belama kelimpah tau nyadika malin ngagai sida ke deka belajar pantun Iban.

Advertisement