Dikarang Jacqueline David
KUCHING: Konferens Antarabansa ke deka diatur Universiti Malaysia Sarawak (UNIMAS), ti berambaika leka jaku ‘Transforming Nursing’ setipak enggau singkang dunya diatu, kelebih agi meri penemu ngaga raban misi ba ubah singkang dunya ke nyengkaum penyakit sereta teknologi baru.
Kepala Fakulti Pekara Berubat enggau Sains Pengerai UNIMAS, Prof Madya Dr Zabidah Putit madah indu misi sigi seruran bisi kaul enggau komuniti tang laban misi ke baru ngereja pengawa, sida setipak enggau penanggul paten penyakit kemaya hari tu, chara ngintu orang sakit pan patut berubah.
“Dalam konferens tu ila, indu misi deka dipadah pasal penyakit baru, teknologi baru, ngambika sida nemu pekara ke baru setipak enggau dunya teknologi diatu, reti nya indu misi ke bekualiti.
“Iya mega nyengkaum transformesyen bekaul enggau teori, pekara ke udah dipansik lalu bakani kitai deka nyalin pansik nyadi pengawa ke dikereja ninting hari nyadi indu misi,” ku Dr. Zabidah.
Iya madah baka nya lebuh bejaku ba aum media pengudah bejuraika ‘Nursing Conference’ keterubah diatur Opis Kaunsil Misi (baruh Opis Menteri Pengerai Malaysia) kena 22-25 Mei tu di Hotel Riverside Majestic, Kuching berebak enggau ‘Jemaah Kejururawatan Malaysia IPTA’ betemu enggau Menteri Pengintu Pengelantang Pendiau, Orang Indu enggau Pemansang Ruang Bilik, Datuk Fatimah Abdullah di opis iya di Baitulmakmur, ti mega deka nyadi temuai ti dipebasa bejadika konferens nya ila.
Ku iya, sebedau konferens nya diatur, kena 22 Mei, pra-konferens bengkel bekaul enggau ‘Evidence Best Practice in Asia’ deka dibantai seiku speaker ari University of Newcastle Australia, bejuraika pansik bekaul enggau pemerat isu nyadi indu misi.
“Amibika chunto, baka telih, nyangka ngelama tu chara misi ngubat lubah gerai, Nya alai, ba pansik nya ila chara baru ngasuh abi telih nya gerai jampat. Enti chara nya manah, nyangka chara ngubat nya tau dikena jemah ila,” ku iya.
Konferens ti deka diatur tu mega kerejasama entara 9 buah IPTA di Malaysia, iya nya UKM, UM, USM, UPM, UNIZAR, UiTM, IIUM enggau UNIMAS, lalu UNIMAS diberi basa ngatur konferens antarabansa tu.
Dr. Zabidah madah penemu ngatur konferens tu mega deka mai raban misi di serata Malaysia enggau dunya datai ke Kuching bekunsi penemu ba pengawa nyadi misi.
Urung 430 penyerta udah netapka diri deka datai, iya nya ari Australia, USA, Hongkong, Singapore, Indonesia, Brunei, Philippines, India, Sri Lanka, Thailand kelimpah ari Malaysia.
Lalu entara speaker ke deka bejaku nya ila, speaker ari Hongkong, Australia, Singapore, Indonesia, menua tu empu enggau 9 universiti ke deka mai speaker diri bejaku ba simposium nya.
“Naka kediatu, nembiak ke udah nembuka pelajar sida iya nyadi misi di UNIMAS, bisi dalam 15 misi lelaki, tang ari 4 taun ke udah datai kediatu, bisi 22 misi lelaki ari 180 nembiak ke ngambi kos tu udah mujur nyadi misi,” ku iya.
“Pengawa nyadi misi lelaki enda kurang baka misi indu, batang pengawa sida iya nyauka sebaka,” ku iya.
Nitihka setindit dunya, Gerempung Pengerai Dunya (WHO) pemayuh misi dibanding enggau komuniti diatu 1:200 tang di Malaysia, 1:375 kebuah pengawa nyadi misi berat ba komuniti.