PAKAN: Parti Tenaga Rakyat Sarawak (TERAS) dilalau enda kelalu randa mai pengari rayat ari penyakal nyadi kaban parti baru nya.
Mandal Presiden Parti Rakyat Sarawak (PRS), Datuk Joseph Salang Gandum madah, TERAS patut ngatur sereta nusun parti nya dulu.
Iya madah, TERAS begunaka sukung ari parti komponen BN ke bukai ngambika diterima dalam BN.
“TERAS patut ulih meri pengandal tauka pengarap ngagai parti komponen Barisan Nasional (BN) ke udah bisi ngambika nyukung sida masuk ngagai BN,” ku iya.
Salang ti mega Kaban Parlimen Julau mansutka pekara nya lebuh bejadika aum besai ninting taun PRS Pampang Pakan di Rumah Jambai, Sungai Engkamop apin lama.
Nambahka nya, iya bepenemu manah agi TERAS berandau enggau BN dulu sebedau mai pengari rayat penyakal ngagai parti nya.
“Nyema kita (TERAS) nerima kaban penyakal ti udah ngelaban parti komponen BN, ambika banding di sitak Pelagus ti diungkup ngagai PRS, nya semina nempa pengeringat,” ku iya.
Kena 15 Mei tu tadi, 10 iku pengari rayat BN ari SUPP enggau Parti Demokratik Progresif Sarawak (SPDP) sereta seiku pengari rayat ari Parti Pekerja Sarawak (SWP) udah masuk parti TERAS.
Pengari rayat ari SUPP nyengkaum Kaban Kunsil Nengeri (ADUN) Bawang Assan Dato Sri Wong Soon Koh, Datuk Dr Jerip Susil (ADUN Bengoh), Dr Johnical rayong (ADUN Engkilili) enggau Ranum Mina (ADUN Opar).
Lalu ari pengari rayat SPDP nyengkaum Kaban Parlimen Saratok ti mega ADUN Pakan, Tan Sri William Mawan Ikom, Datuk Peter Nansian Ngusie (ADUN Tasik Biru), Datuk Sylvester Entri Muran (ADUN Marudi), Paulus Palu Gumbang (ADUN Batu Danau), Rosey Yunus (ADUN Bekenu) enggau Kaban Parlimen Baram, Anyie Ngau.