SONG: Sapit Menteri Pemansang Menua Pesisir enggau Kandang Menua Datuk Alexander Nanta Linggi mujur nyuaka RM88,000 penyampau geran ngagai semilan buah gerempung ukai dikuasa perintah (NGO) ari raban bansa China di pelilih tu, malam ensana.
Sida ke nerima geran tu iya nya Lembaga Pengurusan SJKC Hin Hua, Kelab Lions Song, Komuniti 1Malaysia Kampung Cina Song, JKKK Kampung Cina Song, Gereja Methodist Sang En, Persatuan Buddist Song, Tadika Semarak, Hock Ann Hoe Benevolent Society enggau Persatuan Foochow Song.
Kelimpah ari nya, Kelab Rekreasi Opis Pemadah Song mega bisi nerima geran RM7,000 ari Nanta.
Pengawa nyuaka geran tu diatur beserimbai enggau Pengerami Makai Malam Beserimbai enggau Aum Besai enggau Mantar Gawai Koperasi Song Kapit (KSKB) Berhad ba Balai Mensia Mayuh Song ditu, malam ensana.
Bela bisi datai maya tu iya nya Pemantu Direkter Suruhajaya Koperasi Malaysia (SKM) Beraim Hossen, Sekretari Politik Kepala Menteri Jefferson Jamit Unyat, Pemesai Pelilih Menua Song Jacqualine Ougos, Chairman KSKB Penghulu Baling Jengin enggau Sekretari KSKB Catherine Nain Abit sereta bala raban KSKB ke bukai.