KUCHING: Sapit Presiden Parti Sa’ati Rayat Sarawak (SUPP) Datuk Seri Richard Riot Anak Jaem madah, enti parti Tenaga Rakyat Sarawak (TERAS) deka masuk nyadi kaban Barisan Nsional (BN), nya bepanggai ba semua 13 parti dalam komponen BN sekalika nerima TERAS tauka enda.
“Pemutus ari semua 13 parti dalam komponen BN di Malaysia patut sebaka magang sebedau nerima TERAS nyadi kaban BN.
“Pemutus nya mesti ari semua komponen BN, nitihka ‘consensus’…Nya aja saut aku,” ku Riot lebuh dikerandau maya aum media pengudah bejadika atur pengawa ‘Recognition of Prior Learning (RPL) Assessor Training’ enggau nyain MoU Komiti Ngelatih Pengelandik Baru Nasional (NUC) di Hotel Hilton ditu, kemari.
Iya mega ditanya sekalika setuju enggau jaku presiden SUPP, Tan Sri Peter Chin ti madah, sebarang pemesai SUPP ke deka ningkilka diri ari parti lalu deka begempung enggau TERAS, patut nganjung surat ngetu nyadi kaban SUPP dulu.
“Enti nya munyi jaku presiden…Nya jaku iya, tanya iya empu (Chin). Enti nya datai ari iya empu, awakka iya nyaut. Aku setuju tauka enda, nya penemu aku aja (enggai bekunsi enggau orang bukai penemu iya),” ku iya.
Kena 15 Mei tu tadi, presiden Parti Demokratik Progresif Sarawak (SPDP) ke dulu suba, Tan Sri William Mawan Ikom ti mega Menteri Pemansang Rama enggau Kaban Parlimen Saratok begulai enggau ex-chairman SUPP pampang Sibu, Dato Sri Wong Soon Koh ningkilka diri ari parti seduai lalu masuk TERAS maya sebengkah aum media di Bilik Media, Dewan Kunsil Nengeri (DUN) ditu.
Berindik ari nya, mayuh kaban ex-SPDP ari bepuluh buah pampang di nengeri tu sama ningkilka diri ari SPDP.
Lalu berindik ari nya, Adenan mega bisi madah, BN nengeri dijangka nadai penanggul nerima TERAS nyadi sebagi ari parti dalam BN.