Dikarang Chris Bishop //
Pengerami beungkus RM500,000 deka diatur 30 Mei tu kena ngenang pemanah pengawa iya, ku Wahab
KUCHING: Sebengkah pengerami besai ke diatur kena meri basa ngagai pemeri sereta pemanah pengawa ke udah dikereja Tuai Pemegai Menua (TYT) Pehin Sri Abdul Taib Mahmud deka diatur kena 30 Mei 2014.
Pengerami diatur nengah kerejasama raban parlimen enggau kunsil nengeri lalu disadang bekenaka belanja manggai RM500,000.
Chairman Pengatur Pengerami MP Wahab Dollah madah, pengerami nya enggai enda diatur besai ketegal ngenang pemaik penngawa enggau pemeri Pehin Sri ti udah ngemansangka Sarawak sepemanjai timpuh iya nyadi Kepala Menteri.
“Pengerami besai ungkup Pehin Sri tu diatur sekali aja, kitai deka ngenang pemanah pengawa iya sereta pemeri Pehin Sri lalu pengerami tu deka mandangka semua pengawa ke udah dikereja iya,” ku Wahab maya sebengkah aum pengarang berita pengudah nganjung surat undang ngagai Kepala Menteri Tan Sri Datuk Amar Adenan Satem di Wisma Bapa Malaysia, kemari.
Bela bisi ngulu atur pengawa nya, MP Mas Gading Anthony Nogeh, ADUN Balai Ringin Snowdan Lawan, ADUN Julau Datuk Joseph Salang enggau MP Kota Samarahan Rubiah Wang.
Pengerami nya deka diintu di Hotel Riverside lalu deka diperindang raban okestra 42 iku pemain muzik ti ngiring pengawa malam nya.