KUCHING: Program ‘Mama Care’ ari Opis Menteri Orang Indu, Ruang Bilik enggau Pemansang Komuniti (KWKPK) deka berengkah diatur di Sarawak taun tu.
Mama Care nyadi program meri setipikit ngagai raban orang indu ti ngembuan pengelandik ngurut tubuh orang ti udah beranak ngambika pengelandik sida nya ulih ngenataika belanja ke besai agi.
Menteri nya Dato Sri Rohani Karim madah program enda bebayar ke udah dulu dipejalai di Semenanjung Malaysia nya deka berengkah dipejalai di Sarawak ba awak ke semak tu.
“Sebedau nya, kitai dulu deka ngempuru raban orang ti sigi udah landik ba pengawa ngurut tubuh.
“Kitai nemu mayuh orang indu nengeri tu ngembuan pengelandik nya lalu pekara ke pemadu berat iya nya meri sida setipikit.
“Opis menteri deka ngatur kerejasama enggau palan pelajar tinggi peribit, ngambika sida diberi setipikit pengudah mujur nembuka kos ke diatur dalam timpuh seminggu,”ku Iya.
Rohani mansutka jaku tu ba sebengkah aum pengarang berita pengudah bejadi ‘Women Entrepreneurship Workshop’ ke diatur Angkatan Zaman Mansang (AZAM Sarawak) nengah kerejasama enggau US Embassy di Kuala Lumpur.
Iya ke mega Kaban Parlimen Batang Lupar madah program nya udah mujur mantu raban orang indu di Semenanjung Malaysia ke alai penatai pemisi sida sebulan pengudah nembu program manggai ba ikas RM1,500 ngagai RM6,500.
“Ketegal ti udah nerima setipikit, penatai pemisi sida ninting bulan nambah lalu sekeda bisi udah bekereja di menua Dubai.
“Sida mega ulih diambi gawa ba spital tauka palan pengintu pengerai bukai udah nya,” ku iya.
Ngenang workshop ke diatur sehari kemari, Rohani madah program nyadi entara sebengkah ari mayuh jalai endur ngangkatka orang indu lebih agi ba pekara dagang.
“Kitai nagit maya manggai ba taun 2015 ila, 55 peratus ari penyampau orang indu di Malaysia ulih ngembuan pengawa diri tauka ngaul diri ba pekara dagang.
“Datu ikas nya udah manggai ba 42.4 peratus, lalu kitai nyadang tagit ke ditetap ulih dijapai ngelui ari nya,”ku iya.
Bela datai Kaban direktor Azam Norjanah Razali, kepala Sekretari KWKPK Dato Sri Dr. Noorul Ainur Mohd Nor sereta sapit iya Datuk Sarjeet Singh, Manager Besai AZAM Sarawak Rosalind Yang Misieng enggau orang bukai.