MIRI: Gerempung Anak Bulan Mirah Malaysia (PBSM) Pampang Miri udah nyendiaka pemakai ngagai 119 iku peranak rumah panjai ke dituntung penusah angus di Suai, pengawa mandangka penyiru enggau penyinu ngagai sida ke tasah nya.
Lebuh ke bejaku enggau The Borneo Post apin lama ke udah, pemesai pablisit PBSM Miri, Karambir Singh madah, raban ti nyendiaka pemakai nya betuaika Saa Tawi.
“Sida berengkah nyendiaka pemakai nya kandang dua hari, pengudah penusah nya nyadi kena 24 April nyin kemari,” pia ku iya.
Pemakai nya dibungkus memanah sereta dianjung enggau bantu bukai baka gari ngagai sida ke tasah nya, ke penyauh urung dua jam pejalai ngena kerita ari Miri.
Rumah panjai Akai Angga ke panjai 35 pintu, di ulu entigis Suai Niah dituntung penusah angus kena tengah malam 24 April nyin tadi ti ngujungka 280 iku peranak rumah panjai nya nadai pengenduh endur diau.
Maya nya, tebal agi peranak rumah panjai nya udah tinduk sereta enda sempat nyelamatka reta tengkira diri laban api ke kelalu jampat nyerarai nganguska rumah panjai sida.
Penusah angus nya mega udah nabanka nyawa seiku lelaki ke timpang pendiau ti beumur urung 50 taun.
Berindik ari penusah nya, mayuh macham bantu udah diberi raban menteri ba kandang menua nya enggau sekeda organisasyen kena ngelempungka tating pengidup sida ti disuaka ngagai Akai, ngarika sida serumah.
Sekeda menteri ke bisi nyuaka bantu iya nya Menteri Perengka Guna Mensia Mayuh, Dr Stephen Rundie Utom meri RM500 sepintu enggau Kaban Parlimen Bintulu, Datuk Seri Tiong King Sing (RM50,000).
Serakup Tuai Rumah Panjai Suai, ke alai Akai seiku ari kaban serakup nya mega bisi nyuaka bantu RM2,000 ti disuaka Chairman serakup nya, Boniface Bada.
Ku Bada, sekeda ari peranak rumah panjai nya diatu ngenduh ba gerija ba kandang menua lalu bisi mega sekeda ngenduh ba langkau umai sida.
Ku Karambir, penusah ngenyit ke baka nya endang amat dikemeratka PBSM Miri, nya alai sida bisi numbuhka tim nyumai.