Anda di sini

Kemaruka profil rumah panjai kita: Alexander

Advertisement

Sistem bejalaika pengawa patut dikemanah sereta bisi rikod ke menuku pasal redak diri

KAPIT: Sapit Menteri Pemansang Menua Pesisir enggau Kandang Menua Datuk Alexander Nanta Linggi mujur nyuaka Surat Mangku Pengawa ngagai Tuai Rumah di sitak Pelagus ba sebengkah hotel ditu, Hari Enam tu tadi.

Iya mega ngelalau semua tuai rumah ngambi bejalaika pengawa enggau manah lebih agi ngemaruka semua rikod profil rumah panjai sida.

“Tuai Rumah patut ngemeratka pangku pengawa sereta bejalaika semua atur ngena sistem ti menuku.

“Kita mega patut nemu penyampau ruang bilik sereta pemayuh peranak, rikod belaki bebini enggau sarak, jalai pengidup enggau pengarap redak ti dipegai diri.

Berebak enggau nya, iya mega madah, tapi pengawa Tuai Rumah diatu ukai baka suba semua dilempai ba Opis Pelilih Mit Menua ngambika dirikod.

“Diatu Tuai Rumah patut nemu bekenaka komputer sereta ngerikod kediri semua penerang pasal rumah panjai ti di baruh kuasa kita,” ku iya.

Seraya meransang Komiti Pemansang enggau Pengelikun Genturung Pendiau (JKKK) iya mega ngelalau kaban komiti nya chakah gawa merambu pemansang ti tau nguntungka rayat.

“Semua JKKK ba sesebengkah rumah panjai patut suah agi berandau sereta merambu pemansang ti patut dipejalai di menua diri.

Ngenang elawin ti datai ari perintah diungkup ngagai Tuai Rumah, dia sida patut lurus ati bejalaika pengawa sereta nyukung perintah ke diatu.

“Elawin ti diterima nya datai ari perintah, dia kita mega enda tau enda begempung sereta ngeringka perintah ngambika pemansang muntang agi dipejalai ungkup rayat,” tandu iya.

Dulu ari nya, ba jaku pengelalu iya, DO Kapit Elvis Didit nerangka chara Tuai Rumah dipadu sereta dipilih.

Bisi 103 Tuai Rumah ari sitak Pelagus nerima Surat Mangku Pengawa nyadi Tuai Rumah ari Alexander.

Bela bisi ngulu  atur pengawa nya, Residen Kapit, Fedrick John George; DO Kapit, Elvis Didit; Temenggong Datuk Kenneth Kanyan, walikota Opis Kaunsil Kapit, Philimon Nuing; sekretari politik Kepala Menteri, Wilson Nyabong enggau Jefferson Jamit.

Advertisement