Anda di sini

Joseph Salang temegahka pemanah kaul NGO Dayak

Advertisement

Iya mega ngarapka penegap kaul ulih dikerembai entara kaban gerempung enda ngira pampang  

JULAU: Penyakah Gerempung Ukai Dikuasa Perintah (NGO) ti bepelasarka raban Dayak ke begempung ngintu sereta ngelakuka main enggau adat asal Dayak patut bendar dikemegah.

Chairman Komiti Penyanding Penemu 1Malaysia Sarawak Datuk Joseph Salang Gandum madah, nengah nya, kaban gerempung ulih nempa sereta ngerembaika kaul ti beguna ba sida.

“Aku ke nyadi ketuai berasai gaga amat ati meda pemanah kaul dalam gerempung ke besai baka SDNU, SIDS enggau ke bukai.

“Aku arap kita ulih ngemanahka agi kaul seraya begulai enggau pangan diri enda ngira pampang,” pia ku iya lebuh ti bejadika pengerami Mantar Gawai enggau Hari Pengajar Pelilih Mit Julau, malam kilah ensanus.

Pengerami nya diatur SDNU pampang Julau ti bechairmanka Desmond Sunok Jamba. Bela bisi ngulu pengerami nya, Pemesai Opis Pelajar Pelilih Mit Julau, Andrew Kana enggau bala bukai.

Salang ke mega Kaban Parlimen Julau madah, pengerami Mantar Gawai diatu udah nyadi sebagi ari pengerami ke diintu ba pasar enggau bandaraya taja pan nya ukai adat ke bendar diintu ninting bulan Jun.

“Kiti enda tau enda ngiga chara ngambika pengerami tu enda nyadi pengerami endur ngirup arak nyentuk ke jauh malam.

“Ukai aku ngenggaika kita berami ngelantangka ati, tang di rumah panjai kitai tau berami nyentuk ke pagi laban enda deriba mulaika diri ke rumah,” ku iya.

Lebuh ke ngenang senentang pengerami ngintu Hari Pengajar, ku Salang sebengkah profesyen ke pemadu manah lalu bala nembiak suah agi ngemenuhka jam sida enggau bala pengajar enti dibanding enggau apai indai sida.

“Nya alai pengajar tau endar nyadika pengering endur bala nembiak ngulihka penemu. Enti sida arap sereta andalka sesiku pengajar, bala nembiak tu ulih mujur dalam pelajar sida,” ku iya.

Salang mega meransang apai indai nyaup bala pengajar ngajar sereta ngiring anak sida.

Lebuh ke ngenang sentang pemujur tikas akademik nembiak di Julau, iya berasai gaga endar ati meda pemanah pemutus peresa SPM taun seiti nyin tadi, ke alai Opis Pelajar Pelilih Mit Julau teulihka penuduk kelapan ari 31 buah Opis Pelajar Pelilih Mit di nengeri tu.

Taja pia ku iya, pemanah pelajar ba tikas UPSR patut dikemanah laban pelilih mit semina ba tangga ke-25.

“Aram meh kitai sama chakah agi gawa ngambika ulih nyapai juluk nya,” ku Salang ke lalu nyuaka geran ngagai mayuh bengkah serakup enggau insentif pelajar ngagai bala nembiak ke nyulut ba peresa.

Advertisement