Anda di sini

Bungai Jarau Pub & Lounge palan endur ngelakuka lagu bansa Dayak

Advertisement

KUCHING: Sebengkah palan ti nyendiakka konsep ‘santai’ ke mega endur raban band sereta penanyi ngenataika pengelandik sida dibuka dipuak mengeri Kuching.

Pengawa bejadika Bungai Jarau Pub & Lounge dikemujur Kaban Kunsil Nengeri N25 Balai Ringin, Snowdan Lawan.

Palan tu dipejalai tiga iku sekaban nengah chara dagang kunsi (join-venture), iya nya Siaw Kim Thai, Romie enggau Mathew Abu.

Penerang ari Mathew Abu, ti mega  Penyampai Radio Cats FM, madah buah penemu numbuhka bar tu beduduk ari peneleba ke dikauk lebuh muka sebengkah cafe bepalan ba Jalai Song suba.

Thai enggau Romie mega bela ngembuan mayuh peneleba dalam dunya dagang bekaul enggau palan pemerindang.

Bungai Jarau ngenataika konsep ‘santai’, nyendiaka palan endur raban band, penanyi ngenataika pengelandik sida, kelimpah nyendiaka pelasar mantu ngangkatka populariti lagu-lagu kitai Dayak.

Bala mayuh ke deka sama beperindang, tau nguji pengawa belagu karaoke sereta diperansang mai VCD tauka minus one diri empu.

Dibuka ninting ari berengkah ari pukul 5 lemai, maya ujung minggu deka berengkah dibuka pukul 3 lemai.

Bungai Jarau tu betiban enggau Market Petanak, bisi bejualka pemakai baka babi tunu, sereta lok-lok ikan yu (patut diuji). Gaya ias ba dalam bar tu, ngemeratka ‘konsep etnik’.

“Kami mega ngemeratka pemeresi ba dalam sekalika luar bar, ngambika pulai ngagai pengelantang bala temuai.

“Kami mega nguji deka ngatur mayuh pengawa beperindang begulai enggau penanyi Dayak menua tu, sekalika penanyi baru tauka veteran.

Juluk ati kami, deka ngangkatka palan tu nyadi ‘popular spot’ raban selebriti kitai Dayak sereta mensia mayuh. Aram sama nyukung pengawa bansa kitai,” ku Romie lebuh dikerandau raban pemberita tu tadi.

Penerang ke Silik senentang bar tu tau dipeda ba facebook.com/bungai jarau pub lounge tauka telefon nuju 019 8775587 / 012 8882939 / 016 8074005.

Bela datai Chairman Gerempung Pengansah Seni enggau Main Asal Dayak (PPSKDK), Mervyn Tajem.

Advertisement