Anda di sini

Aku netapka penaluk diri ke SUPP: Harden

Advertisement

SRI AMAN: Parti Sa’ati Rayat Sarawak (SUPP) Pampang Simanggang enggau Lingga setuju sereta nyukung pemutus Chairman SUPP Pampang Simanggang, Datuk Francis Harden Hollis ti nyukung baru ketuai SUPP, pengudah ROS nerima penerang SUPP pasal TDC 2011.

Penerang media ari SUPP Pampang Simanggang enggau Lingga madah, lebuh ke nyadi kaban SUPP sida endang amat ngarapka penanggul parti nya ulih diputar nengah pemutus ROS nya.

“Kami arapka bala SUPP nitihka pemutus Menteri Dalam Nengeri enggau ROS sereta anang agi mantaika mayuh macham penemu pasal TDC 2011.

“Kami mega arapka semua penanggul dalam parti teputar ngambika kitai semua ulih begempung napi pengawa bepilih Kunsil Nengeri tu ila,” ku penerang nya.

Nitihka penerang nya baru, Menteri Muda Pemansang Menua Pesisir enggau Pengawa Berumah Sarawak ke mega Kaban Kunsil Nengeri (ADUN) Simanggang, Datuk Francis Harden Hollis nadai kala merejuk parti ngelama tu.

Iya seiku kaban SUPP ti talukka parti. Nya alai kami arapka bala kaban SUPP ulih ngelala tuju enggau kuing kitai berakup napi gaya politik nengah runding ke betul sereta talukka ketuai parti.

Penerang nya mega madah, kandang menua Simanggang endang sitak DUN parti kami, nembiak redak enggau peranak menua tu patut seati sereta meri sukung ke penuh ngagai Chairman Parti SUPP Pampang Simanggang, Datuk Francis Harden Hollis ngambika iya ulih terus ngarika SUPP enggau Barisan Nasional (BN) ngetanka sitak nya sereta gawa ke rayat seraya ngemansangka sitak Simanggang.

Berebak enggau nya, sebengkah aum enggau bala ketuai  SUPP Simanggang begulai enggau Chairman SUPP Simanggang Datuk Francis Harden Hollis, Ketuai Indu SUPP Simanggang, Ling Siew Hung enggau Chairman SUPP Lingga, Kuek Aik Seng udah diatur kemari.

Advertisement