Anda di sini

TERAS enda deka diterima BN nengeri

Advertisement

Dikarang Chris Bishop //

KUCHING: Presiden SUPP Tan Sri Peter Chin pechaya Parti Tenaga Rakyat Sarawak (Teras) enda deka diterima dalam serakup Barisan Nasional (BN) Nengeri.

Ku iya, Teras semina ulih masuk dalam BN Nengeri enti semua raban ketuai dalam komponen Barisan Nasional setuju.

“Enti kitai beratika konstitusyen BN, sebarang pemutus nerima parti bukai dalam serakup patut dulu nerima pemendar ari raban ketuai.

“Enti raban ketuai enda meri pemendar, Teras enda ulih diterima lalu aku pechaya parti baru nya enda deka diterima dalam serakup BN Nengeri,” ku iya lebuh dikerandau pemberita pengudah temnbu aum ngenyit ‘central working committee’ (CWC) di Indu opis SUPP kemari..

Iya nambah, nitihka peratika aku ba suratkabar sehari tu, 8 iku ketuai dalam BN udah enda setuju Teras diterima masuk.

“Panjai rintai parti bukai ti nganti gintir diterima masuk dalam BN Nengeri, ketegal siti parti enda setuju, pinta sigi deka ditulak,” ku Chin.

Nyaut tanya pemberita senentang berita ke madah Kepala Menteri udah ngeletak pemutus nerima Teras, Chin madah Adenan nadai kala mansutka jaku nya.

Ku Chin, Adenan semina nerima jamin ari Teras dia sida deka seruran dalam BN sereta  nyukung BN.

“Nadai, Adenan nadai kala mansutka jaku nya. Sapa madah Adenan bis nyebut jaku nya. Iya madah raban ari Teras datai nemuai ketegal deka mandangka sukung ngagai iya enggau BN.

“Tang iya (Adenan) nadai kala madah iya nerima Teras dalam BN…tu meh munyika dipadah iya ngagai aku,” ku Chin nandu.

Ba aum ngenyit CWC nya kemari, SUPP netapka pemutus muai chairman pampang Sibu Dato Sri Wong Soon Koh ari parti.

Aum mega ngansak Soon Koh ngusungka penuduk DUN Bawang Assan ke dikuasa iya sereta pia mega ngelengka pangku pengawa menteri ke dipegai dalam kabinet Sarawak.

“Pemutus tu diambi ketegal iya udah ngemelakangka parti ti udah meri jalai ngagai iya bediri ba pengawa bepilih taun 2011 lalu udah nerima sukung ari rayat.

“Aum mega minta YB Datuk Dr Jerip Susil, YB Ranum Mina enggau YB Dr Johnical Rayong meri penerang enggau silik sekalika sida udah nyereta Teras,” ku iya.

SUPP mega enda setuju nerima Teras nyadi parti dalam serakup BN Nengeri tauka diterima nengah formula BN-Plus, tandu Chin.

“19 agih penuduk ke diempu SUPP enggau 7 penuduk parlimen sigi enda tau diubah,” ku Chin nambah.

Advertisement